Тақиқланган ташкилотларга адашиб кириб қолган фуқароларнинг жиноий жавобгарликдан озод этишни сўраб тақдим қилган мурожаатига асосан беш фуқаро жиноий жавобгарликдан озод этилади. Бу ҳақда Бош прокуратура матбуот хизмати «Дарё»га хабар берди.
Маълум қилинишича, Бош прокуратурада 19 сентябрь куни террористик, экстремистик ва бошқа тақиқланган ташкилот ва гуруҳларга адашиб кириб қолган Ўзбекистон фуқароларининг мурожаатларини кўриб чиқиш бўйича Республика идоралараро комиссия йиғилиши бўлиб ўтган.
Унда тақиқланган ташкилотларга адашиб кириб қолган фуқароларнинг жиноий жавобгарликдан озод этишни сўраб тақдим этган мурожаатлари «Террористик, экстремистик ёки бошқа тақиқланган ташкилот ва гуруҳлар таркибига адашиб кириб қолган Ўзбекистон Республикаси фуқароларини жиноий жавобгарликдан озод этиш тартибини такомиллаштириш тўғрисида»ги Президент фармони асосида кўриб чиқилган.
Йиғилиш якунига кўра, комиссия томонидан беш фуқарони жиноий жавобгарликдан озод этиб, Ўзбекистонга қайтариш ҳамда уларга ижтимоий-ҳуқуқий ёрдам кўрсатиш ва бандлигини таъминлаш вазифалари белгилаб олинган. Бугунги кунда ушбу масала бўйича яна 6 та мурожаат ишчи гуруҳ томонидан ўрганилмоқда.
Изоҳ (0)