Jinoyat ishlari bo‘yicha Kasbi tuman sudida mirishkorlik 29 yoshli ayolni o‘zini-o‘zi o‘ldirish darajasiga yetkazishda ayblanayotganlar Sh.G. hamda S.T. ustidan sud ishi boshlangani xususida xabar berilgandi.
Sudya Mahfirat Ochilova raisligida bo‘lib o‘tayotgan sud majlisiga marhuma yashagan hudud — “Yangi Jeynov” MFY profilaktika inspektori Mirzohid Qanoatov ham guvoh sifatida taklif qilindi.
U bilan suhbatlashgan sudya Mahfirat Ochilova voqea joyiga o‘z vaqtida yetib borgan inspektor marhuma Sh.R.ni osilgan holda topgan bo‘lsa, IIB tezkor guruh xodimlari va tergovchisi kelgunga qadar bo‘lgan vaqt oralig‘ida nega voqea joyini qo‘riqlamagani va profilaktika inspektori sifatida hech qanday harakat qilmagani sababi bilan qiziqdi.
Mirzohid Qanoatov profilaktika inspektori sifatida o‘z vazifasini to‘laqonli bajarmagani boisini izohladi.
— O‘sha payt tushkunlikka tushib qolgandim, — deydi Mirzohid Qanoatov.
Sud majlisida ma’lum qilinishicha, voqea joyiga yetib borgan IIB xodimi Mirzohid Qanoatov voqea haqida IIB tezkor guruhiga xabar bergach, ular yetib kelgunga qadar voqea joyini qo‘riqlamagan. Marhuma Sh.R.ning jasadi eshikdan o‘zboshimchalik bilan yechib olinishiga yo‘l qo‘yib bergan.
— Bu esa mijozimning qizim avval o‘ldirilib, keyin osib qo‘yilgan degan taxminiga sabab bo‘lmoqda, — deydi da’vogar Zokir Karimovning advokati Nodirjon Mo‘minov. – IIB xodimining birgina xatosi va o‘z vazifasini to‘laqonli bajarmagani shunday e’tirozga sabab bo‘ldi.
Sud majlisida qatnashgan “Daryo” muxbiriga ko‘ra, profilaktika inspektori tergovga qadar surishtiruv ishlari davomida aytgan ba’zi gaplaridan tongan.
Aytilishicha, mahalla profilaktika inspektori Mirzohid Qanoatov sudda marhuma Sh.R. hamda sobiq IIB xodimi Zafar Aminov o‘rtasida bo‘lib o‘tgan va tasvirga olingan videoni umuman ko‘rmadim degan. Holbuki, jurnalistik surishtiruvlar davomida muxbir bilan suhbatda bo‘lgan Mirzohid Qanoatov video haqiqatdan ham borligi, biroq oxirigacha ko‘rmaganini aytgandi.
Bundan tashqari, 1-aprel kuni ayblanuvchi Sh.G. tomonidan voqea joyiga chaqirilgan IIB xodimi marhuma Sh.R.ga aytgan ba’zi gaplaridan ham tongan. Marhuma IIB xodimi unga aytgan gaplarni o‘limidan avval tanishi, sobiq IIB xodimi Zafar Aminovning telefoniga “sms” tarzida jo‘natgan.
Ma’lum bo‘lishicha, sudda guvoh sifatida ishtirok etgan yana bir fuqaro — Muhayyo Gulnazarova ham tergovga qadar jarayonlarda aytilgan aksariyat ko‘rsatmalaridan tonib, boshqa ko‘rsatma bergan.
Eslatib o‘tamiz, sudda ayblanuvchi sifatida ishtirok etayotgan Sh.G. ehtiyot chorasi sifatida qamoqqa olingan, 1-aprel voqealarini tasvirga olgan T.S. esa garov evaziga ochiqda qoldirilgan.
Izoh (0)