Qirg‘iziston ikki mamlakat fuqarolari o‘rtasida to‘qnashuv kelib chiqqan Tojikiston bilan chegaraga tartibni saqlash uchun qo‘shimcha huquq-tartibot kuchlarini jo‘natdi. “TASS”ning xabar berishicha, bu haqda Qirg‘iziston prezidenti Sooronboy Jeenbekov 26-iyulda Batken viloyati aholisi bilan uchrashuvda ma’lum qilgan.
“Bugungi kunda Tojikiston tomoni bilan birgalikda ko‘rilgan choralar natijasida vaziyat barqarorlashdi. Batken viloyatiga Davlat chegara xizmatining qo‘shimcha kuchlari yuborildi. Endilikda chegaradagi vaziyatni nazorat qilish uchun patrul ishlari doimiy ravishda olib boriladi”, — degan prezident.
Uning so‘zlariga ko‘ra, Tojikiston chegarasidagi vaziyat butunlay uning nazoratida. “Biz barcha muammolarni hal qilamiz, bunga vaqt kerak xolos”, — degan Jeenbekov.
Qirg‘izistonning Oqsoy qishlog‘i va Tojikistonning Vorux anklavi hududida Qirg‘iziston va Tojikiston aholisi o‘rtasida 22-iyul kechasi to‘qnashuv sodir bo‘lgan va qariyb bir sutka davom etgan. Bunga tomonlardan biri bahsli hududda flagshtok o‘rnatgani sabab bo‘lgan. To‘qnashuv vaqtida ishtirokchilar ov qurollari, tosh va tayoqlardan foydalangan.
Qirg‘iziston xavfsizlik maqsadida Oqsoydan viloyat markazi Botkenga 600 nafardan ortiq odamlarni, asosan, ayollar, bolalar va keksalarni olib ketishga majbur bo‘lgan. Hozirda ularning barchasi uylariga qaytarilgan.
Izoh (0)