Қирғизистон икки мамлакат фуқаролари ўртасида тўқнашув келиб чиққан Тожикистон билан чегарага тартибни сақлаш учун қўшимча ҳуқуқ-тартибот кучларини жўнатди. «ТАСС»нинг хабар беришича, бу ҳақда Қирғизистон президенти Сооронбой Жээнбеков 26 июлда Баткен вилояти аҳолиси билан учрашувда маълум қилган.
«Бугунги кунда Тожикистон томони билан биргаликда кўрилган чоралар натижасида вазият барқарорлашди. Баткен вилоятига Давлат чегара хизматининг қўшимча кучлари юборилди. Эндиликда чегарадаги вазиятни назорат қилиш учун патрул ишлари доимий равишда олиб борилади», — деган президент.
Унинг сўзларига кўра, Тожикистон чегарасидаги вазият бутунлай унинг назоратида. «Биз барча муаммоларни ҳал қиламиз, бунга вақт керак, холос», — деган Жээнбеков.
Қирғизистоннинг Оқсой қишлоғи ва Тожикистоннинг Ворух анклави ҳудудида Қирғизистон ва Тожикистон аҳолиси ўртасида 22 июль кечаси тўқнашув содир бўлган ва қарийб бир сутка давом этган. Бунга томонлардан бири баҳсли ҳудудда флагшток ўрнатгани сабаб бўлган. Тўқнашув вақтида иштирокчилар ов қуроллари, тош ва таёқлардан фойдаланган.
Қирғизистон хавфсизлик мақсадида Оқсойдан вилоят маркази Боткенга 600 нафардан ортиқ одамларни, асосан, аёллар, болалар ва кексаларни олиб кетишга мажбур бўлган. Ҳозирда уларнинг барчаси уйларига қайтарилган.
Изоҳ (0)