13 yoshli gonduraslik muhojir Xeydi Games Garsiya otasiga AQSh tomonidan boshpana berilmagani sabab o‘z joniga qasd qildi, deb xabar beradi Forum Daily.
Qiz 23-iyul kuni dafn etilgan, uning otasiga esa bir necha soatga muhojirlarni saqlash markazidan chiqishga ruxsat berishgan.
Qizning xolasi aytishicha, Xeydi to‘rt yildan buyon otasini ko‘rmagani sabab juda tushkunlikka tushib qolgan. Qizaloq tug‘ilganidan ikki oy o‘tib onasi ularni tashlab ketgan va Manuel Games uni bir o‘zi katta qilgan. U Gondurasdagi o‘zlari istiqomat qiladigan shaharda doim zo‘ravonliklar sodir bo‘lib turgani sabab qizini Amerikaga jo‘natib yuborgan. Biroq erkakning o‘ziga muhojirlar bilan shug‘ullanish markazi boshpana bermagan.
Games har kuni qizi bilan telefon orqali gaplashgan va uch marotaba AQSh hamda Meksika chegarasini kesib ham o‘tgan. Har safar uni qo‘lga olishib, qayta Gondurasga qaytarib yuboraverishgan.
1-iyul kuni AQSh immigratsiya xizmati Gamesni Texas yaqinida qo‘lga olib, qizi o‘z joniga qasd qilmaguniga qadar qo‘yib yubormagan.
Izoh (0)