O‘zbekistonga amaliy tashrif bilan kelgan Xitoyning Xorijdagi korxonalarni rivojlantirish bo‘yicha assotsiatsiyasi (CODA) bosh direktori Xe Chjenvey boshchiligidagi delegatsiya Buxoroda bo‘ldi, deb xabar qiladi O‘zA.
Xitoy davlatining turli sohalar bo‘yicha, jumladan, turizm, madaniyat, temir yo‘l transporti, qurilish industriyasi kompaniyalari va korporatsiyalari ishbilarmon doiralari vakillaridan iborat delegatsiyasini viloyat hokimi O‘ktam Barnoyev qabul qildi.
Tadbirda Buxoro viloyatining sanoat, yerosti foydali qazilmalari, to‘qimachilik, qishloq xo‘jalik va boshqa sohalaridagi salohiyati taqdimot qilindi. O‘z navbatida Xitoyning mazkur yo‘nalishlarda faoliyat ko‘rsatayotgan kompaniyalari imkoniyatlari bilan tanishtirildi.
Shundan so‘ng mehmonlar Germaniyaning “KNAUF gips Buxoro” xorijiy korxonasi va turkiyalik investorlar tomonidan barpo etilayotgan zamonaviy texnologiya, ya’ni gidroponika usulida pomidor yetishtiriladigan issiqxona qurilishi bilan tanishdilar. Shuningdek, ular pilla xomashyosini qayta ishlaydigan “Brilliant Buxoro silk” mas’uliyati cheklangan jamiyatida ham bo‘lishdi. Mazkur korxonada xitoylik mutaxassislar ham ish olib borishayotgani mehmonlar e’tiborini tortdi.
Izoh (0)