Samarqanddagi 20 ta istirohat bog‘ida yil yakunigacha bepul Wi-Fi hududi tashkil etiladi. Bu haqda Axborot texnologiyalari va kommunikatsiyalarini rivojlantirish vazirligi Samarqand viloyat hududiy boshqarmasi boshlig‘i N.Eshnazarov ma’lum qildi, deya xabar beradi Zarnews.
Qayd etilishicha, bugungi kunda viloyatda mobil aloqa abonentlari soni 2 million 126 mingtani, IPTV xizmati foydalanuvchilari soni 4,5 mingtani tashkil qilmoqda. Internetdan foydalanuvchilar 850 mingdan ortiq.
2018-yil davomida viloyat bo‘yicha 240 kilometr optiq tolali aloqa kabellari tortilgan bo‘lsa, 2019-yilning 6 oyida bu ko‘rsatkich 335 kilometrga yetdi.
“Obod qishloq” dasturi doirasida 9 ta qishloqda 11 ta 3G va 4G qurilmalari o‘rnatildi hamda ushbu hududlar sifatli mobil aloqa xizmati bilan ta’minlandi.
Yil boshidan buyon “Samarqand” xalqaro aeroporti, temir yo‘l vokzali, “Ulug‘bek” avtoshohbekati, shuningdek, o‘ndan ortiq tarixiy obida va ziyoratgohda bepul Wi-Fi hududlari tashkil etildi. 20 ta istirohat bog‘ida yil yakunigacha shunday hududlar ishga tushadi.
Izoh (0)