Toshkentning Mirobod tumanidagi 2-son Bolalar va o‘smirlar sport maktabiga qarashli basseyn yopilayotgani haqida sportchi bolalar, ota-onalar va murabbiylar 5-iyul kuni xabar topdi, deb yozadi “Nuz.uz”.
Ota-onalardan birining aytishicha, ilgari ushbu basseyn 110-maktabga qarashli bo‘lgan. Hozirda ushbu maktabda milliarder Alisher Usmonov (uning o‘zi shu maktabda o‘qigan) tashabbusi bilan katta ta’mirlash ishlari olib borilmoqda. Basseyn ham yana 110-maktab balansiga o‘tkazilgan. Aytishlaricha, rekonstruksiyadan so‘ng maktab o‘quvchilari jismoniy tarbiya darslarida suzish bilan shug‘ullanadi, shu maqsadda basseyn maktabga berilgan. Ammo shu paytgacha basseynga qatnab kelayotgan 600 ga yaqin sportchi bolalar, murabbiylar va boshqa xodimlar ko‘chada qolgan.
Gap shundaki, deyiladi xabarda, bu Mirobod tumanidagi yagona davlat sport basseynidir. Endi murabbiylarga va bolalarga shaharning turli burchaklari — Yunusobod, Uchtepa, Shayxontohur tumanlaridagi basseynlarda shug‘ullanishni davom ettirish taklif qilinmoqda. Ammo bolalarini bunday uzoqqa mashg‘ulotga olib borish uchun hamma ota-onada ham imkoniyat yo‘q.
Ayni paytda basseyn bilan bog‘liq vaziyat aniq-ravshan emas. Sport vazirligi bu anglashilmovchilik ekanligini, ta’mirlash tugaganidan keyin bolalar suzish bilan shug‘ullanishda davom etishini aytmoqda. Biroq murabbiylar va boshqa barcha xodimlar (16 kishi) allaqachon ishdan bo‘shatilgan.
“…Iltimos, bolalarimizning murabbiylarimiz tarkibi rahbarligi ostida ushbu basseynda shug‘ullanib, turli musobaqalarda O‘zbekiston nomidan qatnashish imkoniyatini bering. Bizning gaplarimiz sizgacha yetib boradi va siz to‘g‘ri qaror qabul qilasiz, deb umid qilamiz. Bolalar esa kelajakda suzish bo‘yicha erishgan natijalari bilan sizga minnatdorlik bildiradi”, — deyiladi ota-onalar va murabbiylarning Alisher Usmonovga yo‘llangan xatida.
Izoh (0)