Toshkentdagi Islom sivilizatsiyasi markazida muzey, 100 minggacha bo‘lgan qo‘lyozmalar kutubxonasi hamda konferensiya zali bo‘ladi

Toshkentda qurilayotgan Islom sivilizatsiyasi markazi 40 mingdan ziyod nodir eksponatlarga ega muzeyni o‘z ichiga oladi. Bu haqda “Daryo” muxbiri markaz binosining qurilish ishlari ketayotgan hududda bo‘lib o‘tgan Xalqaro Press-klubning navbatdagi sessiyasidan xabar berdi.

Ma‘lum qilinishicha, markaz 100 minggacha bo‘lgan nodir qo‘lyozmalar fondiga ega kutubxona, zamonaviy usullarda restavratsiya qilish, tiklash, nusxa olish va ko‘paytirish bo‘limi, nashriyot, 300 kishilik konferensiya zalini o‘z ichiga oladi.

“Sohibqiron Amir Temur bobomizning Oqsaroy peshtoqiga “Bunyodkorlik va saxovat borasidagi boqiy saltanatimiz barchaga namuna bo‘lsin” degan gaplari yozilgan. Bugungi kunda yurtboshimiz bunga “adolat”ni qo‘shib gapiryaptilar. Biz markazning peshtoqlaridan biriga ajdodlarimizning mumtoz yozuvida “Bunyodkorlik va saxovat borasidagi adolatdli davlat siyosatimiz barchaga namuna bo‘lsin” deya yozib qo‘yamiz”, — deydi xattot Habibullo Solih.

Shuningdek, Islom sivilizatsiyasi markazi 44 ta arki peshtoqlari umumbashariy fazilatlar aks etgan naqshi nigorlar bilan bezatiladi.