Тошкентдаги Ислом цивилизацияси марказида музей, 100 минггача бўлган қўлёзмалар кутубхонаси ҳамда конференция зали бўлади

Тошкентда қурилаётган Ислом цивилизацияси маркази 40 мингдан зиёд нодир экспонатларга эга музейни ўз ичига олади. Бу ҳақда «Дарё» мухбири марказ биносининг қурилиш ишлари кетаётган ҳудудда бўлиб ўтган Халқаро Пресс-клубнинг навбатдаги сессиясидан хабар берди.

Маълум қилинишича, марказ 100 минггача бўлган нодир қўлёзмалар фондига эга кутубхона, замонавий усулларда реставрация қилиш, тиклаш, нусха олиш ва кўпайтириш бўлими, нашриёт, 300 кишилик конференция залини ўз ичига олади.

«Соҳибқирон Амир Темур бобомизнинг Оқсарой пештоқига «Бунёдкорлик ва саховат борасидаги боқий салтанатимиз барчага намуна бўлсин» деган гаплари ёзилган. Бугунги кунда юртбошимиз бунга «адолат»ни қўшиб гапиряптилар. Биз марказнинг пештоқларидан бирига аждодларимизнинг мумтоз ёзувида «Бунёдкорлик ва саховат борасидаги адолатдли давлат сиёсатимиз барчага намуна бўлсин» дея ёзиб қўямиз», — дейди хаттот Ҳабибулло Солиҳ.

Шунингдек, Ислом цивилизацияси маркази 44 та арки пештоқлари умумбашарий фазилатлар акс этган нақши нигорлар билан безатилади.