Oliy sudda qarzdorliklar undirilishida o‘zaro hamkorlikni takomillashtirishga bag‘ishlangan videokonferensiya tartibidagi yig‘ilish o‘tkazildi. Bu haqda “Daryo”ga Oliy sud matbuot xizmati ma’lum qildi.
Yig‘ilishda Oliy sud raisining o‘rinbosari Xolmo‘min Yodgorov sud hujjatlarining ijrosi qonuniy muddatlarda to‘liq ta’minlanishi sudlarning obro‘-e’tiborini oshirish, fuqarolarning sudga ishonchini mustahkamlash va ularning manfaatlarini kafolatli himoya qilishda o‘ta muhim o‘rin tutishi, shu bois har bir sudya o‘zi qabul qilgan qarorning ijrosini ta’minlashga alohida mas’uliyat bilan yondoshishi zarurligini ta’kidladi.
Prezidentning 2018-yil 13-iyuldagi “Sud-huquq tizimini yanada takomillashtirish va sud hokimiyati organlariga ishonchni oshirish chora-tadbirlari to‘g‘risida”gi farmonida bu borada muhim vazifalar belgilab berildi. Farmonda belgilangan vazifalar ijrosini ta’minlan maqsadida Oliy sud va Bosh prokuratura huzuridagi Majburiy ijro byurosi bilan qo‘shma ko‘rsatma imzolanib, ijro qilish uchun joylarga yuborildi.
Mazkur qo‘shma ko‘rsatmaning ijrosini to‘liq ta’minlash maqsadida viloyat va tumanlar miqiyosida ishchi guruhlari tashkil qilinib, faoliyati yo‘lga qo‘yildi.
Yig‘ilishda bu borada ko‘rilayotgan chora-tadbirlarga qaramay sud qarorlarining ijrosi talab darajasida emasligi qayd etib o‘tildi. Jumladan, 2018-yil 13-iyul kunidan 2019-yil 5-aprelga qadar respublika sudlari tomonidan jami 611 808 141 474 so‘mlik 970 562 ta ijro hujjat Bosh prokuratura huzuridagi Majburiy ijro byurolariga ijro qilish uchun yuborilgan.
Shundan bugungi kunga qadar 294 676 264 638 so‘mlik (48,2 foiz) 577 534 ta ijro hujjati amalda ijro qilingan, 132 431 643 369 so‘mlik (21,6 foiz) 96 221 ta ijro hujjati esa ijro qonunining boshqa moddalariga asosan tugatilgan. Bugungi kunda 184 700 233 467 so‘mlik (30,2 foiz) 296 807 ta ijro hujjatining ijrosi ta’minlanmagan.
Yig‘ilishda bunday holat bilan aslo murosa qilib bo‘lmasligi, har bir sud hujjati ijrosini ta’minlashga erishish uchun barcha chora-tadbirlarni ko‘rish zarurligi qayd etildi.
Shuningdek, yig‘ilishda sudlar tomonidan Majburiy ijro byurosiga ijro hujjatlarini elektron tarzda yuborish amaliyotini yo‘lga qo‘yish masalasi ham muhokama qilindi.
Izoh (0)