13-fevral kuni Kanadaning otliq politsiyasi Nyufaundlend orolidagi Iceberg Vodka kompaniyasi omborida o‘g‘rilik sodir etilgani haqida ma’lum qildi, deb yozadi Meduza.
O‘g‘rilar oliy navli aroq ishlab chiqarish uchun foydalaniladigan 30 ming litr atrofidagi aysberg (suzib yuruvchi muztog‘) suvini o‘g‘irlagan.
O‘g‘rilik qiymati 7-9 ming dollarga baholangan bo‘lib, u kim tomonidan va nima maqsadda sodir etilgani noma’lum.
Politsiya taxminiga ko‘ra, o‘g‘rilik yakshanba kuni sodir etilgan. O‘g‘rilar ombor hududidagi darvoza va omborning o‘zini ochishgan va aftidan suvni avtosisternada olib ketgan.
Iceberg Vodka rahbari Devid Meyersning aytishicha, qulfni ochib, suvni quyib olishganiga qaraganda jinoyatchilar omborxona qanday tuzilishini bilgan.
Aysberg suvi tozaligi uchun qimmatli hisoblanib, uni yilda bir marta may—iyun oyida olish mumkin. U suvni nafaqat Iceberg Vodka kompaniyasi, balki (kam miqdorda bo‘lsa ham) pivo, kosmetika mahsulotlari ishlab chiqaruvchilar ham oladi.
O‘g‘irlangan suv 150 butilka aroq ishlab chiqarish uchun yetardi. Endi esa kompaniya o‘z zaxiralarini to‘ldirish uchun bahorning oxirigacha kutishga to‘g‘ri keladi.
Ammo omborda yana 20 sisterna suv bo‘lib, Mayersning fikricha, sodir bo‘lgan o‘g‘rilik ishlab chiqarish to‘xtab qolishiga olib kelmaydi.
O‘g‘irlangan suv sug‘urtalanganligi uchun yetkazilgan moliyaviy zararni qoplab olish mumkin.
Izoh (0)