Tugayotgan haftada jahonda qanday muhim voqealar ro‘y berdi, jahon matbuotida qanday mavzular ko‘tarildi. Bu haqda “Daryo”ning haftalik dayjestida tanishishingiz mumkin.
Kinoyali qarsaklar
Budjet sarfi masalasi bilan kechikayotgan AQSh prezident Donald Trampning Kongressga “Mamlakatdagi vaziyat” nomli murojaati nihoyat yangradi. Ushbu nutq bilan bog‘liq esda qolarli jihatlardan biri sifatida demokrat Nensi Pelosining Trampga yo‘llagan kinoyali qarsaklari bilan yodda qoladigan bo‘ldi (ha, u yerda ham deputatlar qarsak chalarkan). Prezident Kongress oldida chiqish qilar ekan, noqonuniy immigrasiya masalasi kamchiliklarini tuzatish “millatning burchi”, Xitoy bilan savdo munosabatlarida adolatsiz savdo bitimlariga barham beradigan haqiqiy, tizimli tadbirlar ishlab chiqilish kerakligi-yu, Amerikadagi ish o‘rinlarini himoya qilish lozimligini ta’kidladi.
Prezident samimiy bir ruhda davlat xizmatiga bel bog‘lagan kongressvumenlarni (ayol deputatlarni) ham olqishlab o‘tdi. Prezidentning devor uchun harakatlari 2020-yilgi saylovda g‘alaba qilish imkonini beradimi, yo‘qmi, buni vaqt ko‘rsatadi. Lekin AQSh prezidentligiga nomzodlardan birining nomini aniq eslab qolamiz — demokratlar vakili Kori Buker.
Nutq payti boshqa qiziq voqea ham ro‘y berdi.
Rim papasining Amirliklarga tashrifi
4-fevral kuni Rim papasi Fransisk BAA poytaxti Abu Dabiga tashrif buyurdi. Bu Rim papalarining islom tamadduni paydo bo‘lgan Arabiston yarim oroliga ilk tashrifidir. Papa mintaqada ketayotgan urushlardan tashvishini ifodaladi va BAA ishtirok etayotgan Yamandagi voqealardan chuqur qayg‘uda ekanligini bildirdi. Shu bilan birga, papa mintaqada boshqa dinga e’tiqod qilivchi shaxslarga fuqarolik berishda adolatli ish tutilishiga umid bildirdi. Pontifikning Abu Dabiga safari davomida tarixiy ahamiyatga ega bo‘lgan birodarlik deklaratsiyasi imzolandi.
Natijasiz muloqot
Donald Tramp fevral oyining oxirlarida Vyetnamda Shimoliy Koreya yetakchisi Kim Chen In bilan ikkinchi marta uchrashisi mumkinligi borasidagi fikrlarni tasdiqladi. Singapurda o‘tgan birinchi uchrashuvdan so‘ng Kim Chen In yadroviy qurol borasida va’dalaridan faqat oz qismini amalga oshirdi. Ehtimol, bu safar Tramp muloqot natijasi o‘laroq shatdaun natijasida tushib ketgan obro‘-e’tiborini o‘nglab olar.
Qirg‘izistonlik jurnalist: “O‘zbekiston sayyohlik borasida bizga qaraganda ancha ilgarilab ketgan”
“Eurasia.net” nashri jurnalisti Laylo Saralayevaning “Qirg‘izistonlik sayyohlar O‘zbekistonni kashf etishyapti” maqolasini e’lon qildi. Muallif sayohatidan olgan taassurotlari bilan o‘rtoqlashar ekan, Toshkentni Bishkek bilan taqqoslaydi.
“Toshkent avvalo o‘zining ozodaligi bilan diqqatimni tortdi. Yo‘llarda kuzatuv kameralari o‘rnatilgan. Mashinalar qatnovi ko‘p bo‘lishiga qaramay, tartib bor. Ammo pulni so‘mga aylantishga tog‘ri kelganda ayrim qiyinchiliklarga duch keldim”, — deb yozadi jurnalist.
Muallif Buxoroga sayohat qilar ekan, O‘zbekiston poyezdlaridagi holatni Qirg‘iziston poyezdlari bilan taqqoslaydi va o‘z yurtidagi poyezd xizmati ancha ortda qolganidan tushkunlikka tushganini yashirmaydi.
750 millionga yaqin odam qashshoqlikda yashashda davom etmoqda
Jahon banki saytida Divanshi Uadhaning tahliliy maqolasi e’lon qilindi. Maqolada dunyo bo‘yicha 736 million inson mutloq qashshoqlikda kun kechirayotgani e’tirof etiladi. Shu insonlardan 368 millioni Hindiston, Nigeriya, Kongo Demokratik Respublikasi, Habashiston va Bangladeshda istiqomat qilayotgani aytiladi.
Jahon banki qashshoqlikda kun kechirayotganlar deganda kuniga 1,9 dollardan kamroq mablag‘ga yashayotgan insonlar toifasini tushunadi. Muallif, shuningdek, qashshoqlik hajmini 3 foizga kamaytirish maqsad qilib olinganini ham ta’kidlab o‘tadi. Maqolada yozilishicha, 2030-yilga borib Hindiston va Bangladeshdagi mutloq qashshoqlikka barham berilishi kutilmoqda, ammo Nigeriya va Habashistondagi qashshoqlik holati ancha keskin tus olishi mumkin.
Izoh (0)