Тугаётган ҳафтада жаҳонда қандай муҳим воқеалар рўй берди, жаҳон матбуотида қандай мавзулар кўтарилди. Бу ҳақда «Дарё»нинг ҳафталик дайжестида танишишингиз мумкин.
Кинояли қарсаклар
Бюджет сарфи масаласи билан кечикаётган АҚШ президент Дональд Трампнинг Конгрессга «Мамлакатдаги вазият» номли мурожаати ниҳоят янгради. Ушбу нутқ билан боғлиқ эсда қоларли жиҳатлардан бири сифатида демократ Ненси Пелосининг Трампга йўллаган кинояли қарсаклари билан ёдда қоладиган бўлди (ҳа, у ерда ҳам депутатлар қарсак чаларкан). Президент Конгресс олдида чиқиш қилар экан, ноқонуний иммиграсия масаласи камчиликларини тузатиш «миллатнинг бурчи», Хитой билан савдо муносабатларида адолатсиз савдо битимларига барҳам берадиган ҳақиқий, тизимли тадбирлар ишлаб чиқилиш кераклиги-ю, Америкадаги иш ўринларини ҳимоя қилиш лозимлигини таъкидлади.
Президент самимий бир руҳда давлат хизматига бел боғлаган конгрессвуменларни (аёл депутатларни) ҳам олқишлаб ўтди. Президентнинг девор учун ҳаракатлари 2020 йилги сайловда ғалаба қилиш имконини берадими, йўқми, буни вақт кўрсатади. Лекин АҚШ президентлигига номзодлардан бирининг номини аниқ эслаб қоламиз — демократлар вакили Кори Букер.
Нутқ пайти бошқа қизиқ воқеа ҳам рўй берди.
Рим папасининг Амирликларга ташрифи
4 февраль куни Рим папаси Франциск БАА пойтахти Абу Дабига ташриф буюрди. Бу Рим папаларининг ислом тамаддуни пайдо бўлган Арабистон ярим оролига илк ташрифидир. Папа минтақада кетаётган урушлардан ташвишини ифодалади ва БАА иштирок этаётган Ямандаги воқеалардан чуқур қайғуда эканлигини билдирди. Шу билан бирга, папа минтақада бошқа динга эътиқод қиливчи шахсларга фуқаролик беришда адолатли иш тутилишига умид билдирди. Понтификнинг Абу Дабига сафари давомида тарихий аҳамиятга эга бўлган биродарлик декларацияси имзоланди.
Натижасиз мулоқот
Дональд Трамп февраль ойининг охирларида Вьетнамда Шимолий Корея етакчиси Ким Чен Ин билан иккинчи марта учрашиси мумкинлиги борасидаги фикрларни тасдиқлади. Сингапурда ўтган биринчи учрашувдан сўнг Ким Чен Ин ядровий қурол борасида ваъдаларидан фақат оз қисмини амалга оширди. Эҳтимол, бу сафар Трамп мулоқот натижаси ўлароқ шатдаун натижасида тушиб кетган обрў-эътиборини ўнглаб олар.
Қирғизистонлик журналист: «Ўзбекистон сайёҳлик борасида бизга қараганда анча илгарилаб кетган»
«Eurasia.net» нашри журналисти Лайло Саралаеванинг «Қирғизистонлик сайёҳлар Ўзбекистонни кашф этишяпти» мақоласини эълон қилди. Муаллиф саёҳатидан олган таассуротлари билан ўртоқлашар экан, Тошкентни Бишкек билан таққослайди.
«Тошкент аввало ўзининг озодалиги билан диққатимни тортди. Йўлларда кузатув камералари ўрнатилган. Машиналар қатнови кўп бўлишига қарамай, тартиб бор. Аммо пулни сўмга айлантишга тоғри келганда айрим қийинчиликларга дуч келдим», — деб ёзади журналист.
Муаллиф Бухорога саёҳат қилар экан, Ўзбекистон поездларидаги ҳолатни Қирғизистон поездлари билан таққослайди ва ўз юртидаги поезд хизмати анча ортда қолганидан тушкунликка тушганини яширмайди.
750 миллионга яқин одам қашшоқликда яшашда давом этмоқда
Жаҳон банки сайтида Диванши Уадҳанинг таҳлилий мақоласи эълон қилинди. Мақолада дунё бўйича 736 миллион инсон мутлоқ қашшоқликда кун кечираётгани эътироф этилади. Шу инсонлардан 368 миллиони Ҳиндистон, Нигерия, Конго Демократик Республикаси, Ҳабашистон ва Бангладешда истиқомат қилаётгани айтилади.
Жаҳон банки қашшоқликда кун кечираётганлар деганда кунига 1,9 доллардан камроқ маблағга яшаётган инсонлар тоифасини тушунади. Муаллиф, шунингдек, қашшоқлик ҳажмини 3 фоизга камайтириш мақсад қилиб олинганини ҳам таъкидлаб ўтади. Мақолада ёзилишича, 2030 йилга бориб Ҳиндистон ва Бангладешдаги мутлоқ қашшоқликка барҳам берилиши кутилмоқда, аммо Нигерия ва Ҳабашистондаги қашшоқлик ҳолати анча кескин тус олиши мумкин.
Изоҳ (0)