Farg‘ona shahridagi “Jasmin” tantanalar majmuasida “FERGHANA BUSINESS AWARDS – 2018” tantanali taqdirlash marosimi bo‘lib o‘tdi. Taqdirlash marosimida 150 nafardan ortiq tadbirkor va investor ishtirok etdi. Bu haqda “Daryo” muxbiri Azizjon Ermatov ma’lum qildi.
Farg‘ona viloyatida yilning eng yaxshi tadbirkor va investorlarini qo‘llab-quvvatlash maqsadida ilk bor o‘tkazilgan ushbu marosimda “Yilning eng faol investori”, “Yilning xorijiy investitsiya ishtirokidagi eng yaxshi korxonasi”, “Yilning eng yaxshi eksportyor korxonasi”, “Yilning eng namunali soliq to‘lovchisi”, “Yilning eng yaxshi ish beruvchi korxonasi”, “Yilning eng yaxshi menejeri”, “Yilning eng faol yosh tadbirkori”, “Yilning eng yaxshi innovatsion loyihasi” kabi 16 nominatsiya bo‘yicha g‘oliblar taqdirlandi.
Bugungi kunda Farg‘ona viloyatida hududlarni kompleks rivojlantirish bo‘yicha dasturlar doirasida umumiy qiymati 2,7 trillion so‘mdan ortiq bo‘lgan 461 ta loyiha amalga oshirilib, ularda 7 mingdan ziyod yangi ish o‘rinlari yaratildi.
Loyihalarni amalga oshirishga tijorat banklari tomonidan 1 trillion 104 milliard so‘m kredit mablag‘lari ajratildi, yil boshidan jalb qilingan xorijiy investitsiyalar miqdori 149 million dollarni tashkil etdi. Shu bilan birga, loyiha tashabbuskorlarining 1 trillion 103 milliard so‘m mablag‘i mazkur loyihalarga yo‘naltirildi.
Qo‘qon shahridagi “Adan Textile” MChJda bolalar va sport sumkalari ishlab chiqarish, Uchko‘prik tumanidagi “Qaqir sanoat invest” MChJda trikotaj mato ishlab chiqarish va bo‘yash, “Zunnur servis farm” MCHJda dori-darmon vositalari ishlab chiqarish, Dang‘ara tumanidagi “Dangara mega cattle” MChJda elektrotexnika tovarlari ishlab chiqarish kabi import o‘rnini bosuvchi eksportbop mahsulotlar ishlab chiqarish loyihalari amalga oshirildi.
Qo‘qon shahrida “Admiral group” MChJ tomonidan qiymati 6,4 milliard so‘m bo‘lgan, yiliga 35 ming tonna un mahsulotlari yetkazib berish imkoniyatiga ega loyihaning ishga tushirilishi natijasida 50 ta yangi ishchi o‘rni yaratildi.
Viloyatda 2018-yil davomida xorijiy sarmoya ishtirokidagi 70 ta korxona ro‘yxatdan o‘tib, faoliyat olib bormoqda. Bulardan 49 tasi qo‘shma korxona va 21 tasi xorijiy korxonadan iborat. Korxonalar asosan Xitoy, Rossiya, Turkiya, Janubiy Koreya kompaniyalari investitsiyasi ishtirokida tashkil etilgan.
Izoh (0)