Xavfsizlik, huquqni muhofaza qilish organlari va sud hokimiyati tizimi xodimlariga berilgan soliq imtiyozlari bekor qilinmoqda. Bu haqda Davlat xizmatlari agentligi xabar berdi.
Yangi qabul qilingan qonunga ko‘ra, 2019-yilning 1-yanvaridan soliq solishdan to‘liq ozod qilinganlar ro‘yxatidan quyidagi jismoniy shaxslar chiqarilmoqda:
O‘zbekiston Respublikasi mudofaa, ichki ishlar, favqulodda vaziyatlar vazirliklarining, Davlat xavfsizlik xizmatining harbiy xizmatchilari, ichki ishlar organlari hamda bojxona organlarining oddiy xizmatchilari va boshliqlari tarkibiga kiruvchi shaxslar, shuningdek o‘quv yoki sinov yig‘inlariga chaqirilgan harbiy xizmatga majburlar — xizmatni o‘tash (xizmat vazifalarini bajarish) munosabati bilan olgan pul ta’minoti, pul mukofotlari va boshqa to‘lovlar summalari bo‘yicha.
O‘zbekiston Respublikasi Konstitutsiyaviy sudining, O‘zbekiston Respublikasi Oliy sudi, fuqarolik va jinoyat ishlari bo‘yicha sudlar, iqtisodiy, ma’muriy va harbiy sudlar sudyalari, shuningdek prokuratura organlarining mansab darajalariga ega bo‘lgan xodimlari — ularning xizmat vazifalarini bajarishi munosabati bilan olgan daromadlari ham endi to‘liq soliqqa tortiladi.
Izoh (0)