27-dekabrning asosiy yangiliklari — “Daryo” dayjestida.
O‘zbekiston Prezidenti Shavkat Mirziyoyev Turkiyaning Turcomoney moliyaviy-iqtisodiy jurnalining yillik reytingida “Yilning xorijiy davlat arbobi” deb topildi.
O‘zbekiston rahbarining tashqi dunyo, xususan, Turkiya va Markaziy Osiyo davlatlari bilan siyosiy-iqtisodiy aloqalar va o‘zaro hamkorlik mustahkamlanishiga qo‘shgan salmoqli hissasi e’tirof etildi.
Mazkur reyting ikki asosiy (“Yilning xorijiy davlat arbobi” va “Turkiyaning atoqli davlat arbobi”) nominatsiya va 6 ta yo‘nalish bo‘yicha belgilanadi. Kollegial komissiya va jyuri qarori Turkiya hamda chet el siyosatchilari, biznes vakillari faoliyatini o‘rganish va tahlil qilish asosida qabul qilinadi. Jyuri tarkibiga jurnal ekspertlari, Turkiya hukumati va parlamenti a’zolari, mamlakat mintaqalari vakillari kiradi.
***
O‘zbekiston Oshpazlar uyushmasida o‘zbek milliy nonushtasi standarti taqdimoti bo‘lib o‘tdi.
O‘zbek milliy nonushtasi standartiga sutli taomlar — shirguruch, shirqovoq va sutli atala, nonlarning xilma-xil turlari, somsa, qatlama, shuningdek, meva va sabzavotlar, shirinliklar va quruq mevalar, shu jumladan, asal, murabbo va sumalak kirdi. Standart ichimliklardan shirchoyni o‘z ichiga oldi.
***
Toshkentda Yangi yil bayrami arafasida olma daraxti meva soldi.
Jurnalistika va ommaviy kommunikatsiyalar universiteti hovlisidagi olma daraxtlari Yangi yil bayrami arafasida meva soldi.
Mahalla oqsoqollariga ko‘ra, ular avval bunday tabiat hodisasini kuzatmagan.
***
Markaziy Osiyo yetakchilari Yangi yil bayramini asosan oila davrasida kutib oladi.
Turkmaniston prezidenti Gurbanguli Berdimuhamedov ko‘p joylarga sevimli nevarasi Kerimguli bilan boradi. Kuni kecha Yangi yil oldidan uyushtirilgan tadbirda ishtirok etib, nevarasi yozgan qo‘shiqni birgalikda ijro etishdi.
Qozog‘iston rahbarining qizi Darig‘a Nazarboyeva so‘zlariga ko‘ra, Yangi yil kechasida oilaning barcha a’zosi birga yig‘iladi. Ular Yangi yilni kutib olish uchun prezidentning Olmaotadagi uyiga yo‘l olishadi.
O‘zbekiston prezidenti Shavkat Mirziyoyev o‘tgan yili Yangi yilni oila davrasida nishonlangandi. Kelayotgan bayramni qanday kutib olishi esa hozircha ma’lum emas.
***
Bugun, 27-dekabr kuni O‘zbekiston Prezidenti Shavkat Mirziyoyev Rossiya prezidenti Vladimir Putin, Turkmaniston, Qozog‘iston va Turkiya prezidentlari Gurbanguli Berdimuhamedov, Nursulton Nazarboyev va Rajab Toyyib Erdo‘g‘on bilan telefon orqali muloqot qildi.
Davlatlar rahbarlari bilan alohida suhbatlari chog‘ida prezidentlar o‘zaro bayram tabriklari bilan almashdi, shuningdek, hamkorlikning dolzarb masalalarini va ko‘p jabhali sheriklik istiqbollarini ko‘rib chiqdi.
Izoh (0)