Фарғонада йилнинг энг яхши тадбиркор ва инвесторларини тақдирлаш маросими ўтказилди (фото)

Фарғона шаҳридаги «Жасмин» тантаналар мажмуасида «FERGHANA BUSINESS AWARDS – 2018» тантанали тақдирлаш маросими бўлиб ўтди. Тақдирлаш маросимида 150 нафардан ортиқ тадбиркор ва инвестор иштирок этди. Бу ҳақда «Дарё» мухбири Азизжон Эрматов маълум қилди.

Фарғона вилоятида йилнинг энг яхши тадбиркор ва инвесторларини қўллаб-қувватлаш мақсадида илк бор ўтказилган ушбу маросимда «Йилнинг энг фаол инвестори», «Йилнинг хорижий инвестиция иштирокидаги энг яхши корхонаси», «Йилнинг энг яхши экспортёр корхонаси», «Йилнинг энг намунали солиқ тўловчиси», «Йилнинг энг яхши иш берувчи корхонаси», «Йилнинг энг яхши менежери», «Йилнинг энг фаол ёш тадбиркори», «Йилнинг энг яхши инновацион лойиҳаси» каби 16 номинация бўйича ғолиблар тақдирланди.

Бугунги кунда Фарғона вилоятида ҳудудларни комплекс ривожлантириш бўйича дастурлар доирасида умумий қиймати 2,7 триллион сўмдан ортиқ бўлган 461 та лойиҳа амалга оширилиб, уларда 7 мингдан зиёд янги иш ўринлари яратилди.

Лойиҳаларни амалга оширишга тижорат банклари томонидан 1 триллион 104 миллиард сўм кредит маблағлари ажратилди, йил бошидан жалб қилинган хорижий инвестициялар миқдори 149 миллион долларни ташкил этди. Шу билан бирга, лойиҳа ташаббускорларининг 1 триллион 103 миллиард сўм маблағи мазкур лойиҳаларга йўналтирилди.

Қўқон шаҳридаги «Adan Textile» МЧЖда болалар ва спорт сумкалари ишлаб чиқариш, Учкўприк туманидаги «Қақир саноат инвест» МЧЖда трикотаж мато ишлаб чиқариш ва бўяш, «Zunnur servis farm» МЧЖда дори-дармон воситалари ишлаб чиқариш, Данғара туманидаги «Dangara mega cattle» МЧЖда электротехника товарлари ишлаб чиқариш каби импорт ўрнини босувчи экспортбоп маҳсулотлар ишлаб чиқариш лойиҳалари амалга оширилди.

Қўқон шаҳрида «Admiral group» МЧЖ томонидан қиймати 6,4 миллиард сўм бўлган, йилига 35 минг тонна ун маҳсулотлари етказиб бериш имкониятига эга лойиҳанинг ишга туширилиши натижасида 50 та янги ишчи ўрни яратилди.

Вилоятда 2018 йил давомида хорижий сармоя иштирокидаги 70 та корхона рўйхатдан ўтиб, фаолият олиб бормоқда. Булардан 49 таси қўшма корхона ва 21 таси хорижий корхонадан иборат. Корхоналар асосан Хитой, Россия, Туркия, Жанубий Корея компаниялари инвестицияси иштирокида ташкил этилган.