Samarqand viloyati Kengashi sessiyasida viloyat mahalliy budjetining joriy yildagi ijrosi hamda 2019-yilgi budjet parametrlari muhokama qilindi. Bu haqda “Zarnews” xabar berdi.
Sessiyaga kiritilgan masala yuzasidan viloyat moliya bosh boshqarmasi boshlig‘i B.Mirzayev axborot berdi.
Tadbirda ta’kidlanishicha, joriy yil yakuniga ko‘ra, viloyat mahalliy budjetining daromadlar qismi barcha soliq turlari va boshqa tushumlar bo‘yicha 2017-yilga nisbatan 471 milliard so‘mga yoki 130 foizga o‘sib, 2,2 trillion so‘mni tashkil etilishi kutilmoqda.
Budjet daromadlarini ko‘paytirish bo‘yicha amalga oshirilayotgan tadbirlar natijasida mahalliy byudjet xarajatlari yil yakuni bilan 3,4 trillion so‘mni tashkil etib, o‘tgan yilga nisbatan 45 foizga oshadi. Buning evaziga “Obod qishloq” va “Obod mahalla” dasturlari doirasida 29 ta qishloq va 4 ta mahallada boshlangan bunyodkorlik va obodonlashtirish ishlarini moliyalashtirishga 75 milliard so‘m ajratildi.
Shuningdek, aholining turmush sharoitini yaxshilash, ularni ish bilan ta’minlash, yosh tadbirkorlarni qo‘llab-quvvatlash maqsadida “Yoshlar — kelajagimiz” davlat dasturi doirasida 3,2 milliard so‘m hamda bandlik jamg‘armasi orqali “Mikrokreditbank” va “Xalq banki”ning ustav kapitallarini oshirish hisobiga 5 milliard so‘m imtiyozli kreditlar ajratishga yo‘naltirilmoqda.
2019-yil uchun viloyat mahalliy budjetining jami xarajatlari 4,3 trillion so‘mni tashkil etishi belgilangan. Sohalar kesimida tahlil qiladigan bo‘lsak, ijtimoiy soha xarajatlari 3,5 trillion so‘mdan ortiq yoki umumiy xarajatlarning 88 foizini tashkil qiladi. Jumladan, ta’lim xarajatlariga 2244,9 milliard so‘m, sog‘liqni saqlash sohasiga 949,4 milliard so‘m, madaniyat sohasiga 29,1 milliard so‘m mablag‘ ajratish ko‘zda tutilgan.
Hisobotlarda aytilishicha, viloyat xalq ta’limi tizimiga 2018-yilning 11 oyi davomida davlat budjetidan jami 1,3 trillion so‘mdan ortiq xarajat amalga oshirilgan. Bundan tashqari, viloyatda sog‘liqni saqlash tizimida aholi uchun zarur sharoitlarni yaratish maqsadida investitsiya dasturiga muvofiq 36 ta obyektda 70,2 milliard so‘mlik qurilish va ta’mirlash ishlari bajarildi. Viloyatdagi davolash-profilaktika muassasalari 545 ming dollar miqdoridagi “Salomatlik—3” loyihasi va mahalliy budjet mablag‘lari hisobidan 4 milliard 8 million so‘mlik zamonaviy tibbiy asbob-uskunalar bilan jihozlandi.
Sessiyada tashkiliy masala ko‘rildi. Unda Gavhar Alimova viloyat hokimining o‘rinbosari, xotin-qizlar qo‘mitasi raisi etib tasdiqlandi.
Sessiyada O‘zbekiston Respublikasi Davlat soliq qo‘mitasi raisi B.Musayev ishtirok etdi.
Izoh (0)