O‘zbekiston IIVning Patrul-post xizmati va jamoat tartibini saqlash bosh boshqarmasi boshlig‘i Dilshod Akramov (suratda) 4-avgust kuni Toshkent markazidagi o‘z xizmat xonasida shafqatsizlarcha o‘ldirib ketilgan edi. Ko‘p o‘tmay ushbu jinoyatni sodir etishda gumon qilinib, Toshkent shahar IIBB Huquqbuzarliklar profilaktikasi boshqarmasi katta inspektori R.Abdullayev qo‘lga olingandi. Shundan beri ushbu ish bo‘yicha biror axborot berilmagan edi. 19-dekabr kuni Xalqaro press-klubda tashkil etilgan tadbirda O‘zbekiston bosh prokurori o‘rinbosari Erkin Yo‘ldoshev jurnalistlarning Dilshod Akramov ishi bo‘yicha bergan savoliga ham javob bergan, deya xabar bermoqda “Kun.uz”.
“Tergov olib borishning o‘z me’yorlari bor. Men tergov jarayoni qaysi bosqichda ekaniga doir ma’lumotga ega emasman, biroq tergov ishlari borayotganidan xabarim bor. O‘ylaymanki, ish sudga oshirilganida, bu haqda barcha to‘liq ma’lumot taqdim etiladi”, — dedi bosh prokuror o‘rinbosari Erkin Yo‘ldoshev.
Ma’lumot uchun, IIVning yuqori martabali vakili hisoblangan Dilshod Akramovning o‘ldirilishi yuzasidan Toshkent shahar prokuraturasi tomonidan Jinoyat kodeksining 97-moddasi 2-qismi “j” (“o‘ta shafqatsizlik bilan qasddan odam o‘ldirish”) bandi bilan jinoyat ishi qo‘zg‘atilgan. Ish yuzasidan dastlabki tergov Bosh prokuraturaning “O‘ta og‘ir jinoyatlarni tergov qilish” boshqarmasi tomonidan olib borilayotgani aytilgandi.
Izoh (0)