Ijtimoiy tarmoqlarda xodimlarning mehnat huquqlari buzilishiga oid, xususan ish beruvchining aybi bilan xodimga oylik maoshini o‘z vaqtida berilmayotgani xususida ko‘plab murojaatlar e’lon qilinmoqda, deb yozadi O‘zA.
Masalan, Izboskan tumanida yashovchi fuqaro T. Boltaboyev Facebook’ning “Xalq bilan muloqot /Dialog s narodom” guruhiga tumandagi Mexanika ta’mirlash korxonasida ishlab kelayotganligi, biroq 2018-yil avgust oyidan buyon ish haqi berilmayotganligi haqida murojaat joylashtirgan.
Andijon viloyati adliya boshqarmasi tomonidan mazkur holat o‘rganilganda, Andijon viloyati mexanika ta’mirlash korxonasida fuqaro T. Boltaboyev va yana 24 nafar xodimning bir necha oylardan buyon ish haqi to‘lanmasdan kelinayotgani aniqlangan.
Qonunchilikka ko‘ra, ish beruvchi o‘zining moliyaviy holatidan qat’i nazar, xodimga bajargan ishi uchun haq to‘lashi shart. Mulkchilik shaklidan qat’i nazar, korxonalar va tashkilotlar rahbarlari xodimlarga ish haqi o‘z vaqtida va to‘liq to‘lanishi uchun shaxsan javobgardir.
Biroq, Andijon viloyati mexanika ta’mirlash korxonasidama’muriyati o‘z majburiyatlarini buzib, 2018-yil 1-noyabr kuniga qadar xodimlarga jami 55 million 766 ming 474 so‘m ish haqi bermagan.
Adliya vazirligi jamoatchilik bilan aloqalar bo‘limida ma’lum qilishlaricha, yuqoridagilarga asosan viloyat adliya boshqarmasi tomonidan 2018-yil 12-noyabr kuni xodimlar ish haqini zudlik bilan to‘lash yuzasidan korxonaga rasmiy munosabat bildirilgan.
Natijada xodimlarga to‘lanmay kelinayotgan ish haqlari to‘liq to‘lab berilgan. Qonun hujjatlari buzilishiga yo‘l qo‘ygan bosh hisobchiga nisbatan esa intizomiy jazo chorasi qo‘llanilgan.
Izoh (0)