O‘zbekistonda elektr energiya ishlab chiqarish quvvatlarini oshirish barobarida mavjud resurslardan tejamli va samarali foydalanishga alohida e’tibor qaratilmoqda. Bu haqda “Taraqqiyot strategiyasi” markazida tashkil etilgan “2018-yilda iste’molchilarni uzluksiz elektr energiyasi bilan ta’minlash borasidagi faoliyat: erishilgan natijalar va istiqboldagi ustuvor vozifalar” mavzusida o‘tkazilgan matbuot anjumanida to‘xtalib o‘tildi.
“Elektr energiya ishlab chiqarishni qanchalik oshirmaylik, agar uning sarfini tartibga solmas ekanmiz, yildan yilga ortib borayotgan talabni qondirish juda mushkul”, – deydi “O‘zbekenergo” aksionerlik jamiyati boshqaruvi raisi Ulug‘bek Mustafoyev.
“Misol uchun, bugun aholi farovonligi oshayotganligi sababli har bir xonadonda kamida bitta televizor, kir yuvish mashinasi, changyutgich, konditsioner kabi maishiy texnikalar bor. Ba’zida ulardan foydalanib bo‘lgach, tokdan uzib qo‘yilmaydi. Garchi, ular o‘chirilgan bo‘lsa-da, tok liniyasiga ulangan holda turaversa, elektr energiya iste’mol qilaveradi. Birgina oddiy telefon quvvatlagichini olaylik. U tokka ulangan holda kunu tun qolsa, o‘rtacha bir oyda 1,5 kilovatt/soat, yiliga 18 kilovatt/soat energiya sarflaydi. Shu bois mamlakatimizda ham xonadonlarda, ishlab chiqarish sanoatida va boshqa turli tarmoqlarda elektr energiya tejamkorligini ta’minlash ustuvor vazifa bo‘lib qolmoqda”, — dedi Mustafoyev.
Mutaxassislarning o‘rganishlariga, hozirda O‘zbekistondagi har bir xonadonda bir yilda o‘rtacha 400 kilovatt/soatgacha elektr energiyasini tejash imkoniyati bor. Bu ko‘rsatkich respublika bo‘yicha 1,8 milliard kilovatt/soatga aylanadi.
“Taqqoslaydigan bo‘lsak, ushbu tejalgan energiya bilan aholisi o‘rtacha bo‘lgan bir viloyatni bir yil mobaynida uzluksiz elektr energiya bilan ta’minlash mumkin. Demak, har bir inson o‘z xonadonida elektrning behuda isrofgarchiligiga chek qo‘yish yo‘li bilan chiroq yetib bormayotgan qancha-qancha xonadonlarga yorug‘lik ulashish imkoni mavjud ekan. Bu ham savobli, ham foydali ishdir”, — deyiladi “O‘zbekenergo” matbuot xizmati axborotida.
“Elektr energiyani tejash orqali ekologik barqarorlikka ham munosib ulush qo‘shish mumkin. Misol uchun, 1 kilovatt/soat elektr ishlab chiqarish jarayonida atmosferaga 0,6 kilogramm ko‘mir chiqindisi, 0,12 metr kub is gazi chiqadi. Demak, har bir iste’molchi xonadonida elektr energiyadan oqilona foydalansa, ham tabiiy ne’matlarni tejashga, ham atrof-muhit musaffoligiga o‘z ulushini qo‘shgan bo‘ladi. Shuningdek, iste’molchini ortiqcha mablag‘ sarflashdan ham asraydi. Iqtisod qilingan mablag‘ jamg‘arib borilsa, ro‘zg‘orning qancha kam-ko‘stini to‘ldirish mumkin”, — deydi “O‘zbekenergo” rahbari Ulug‘bek Mustafoyev.
Izoh (0)