Rossiya prezidenti Vladimir Putin Ukrainaning do‘stona bo‘lmagan harakatlari munosabati bilan ushbu mamlakatga nisbatan “maxsus iqtisodiy choralar” tatbiq etishni nazarda tutuvchi farmonni imzoladi. Bu haqda Kreml saytida ma’lumot berilgan.
Farmonda aynan qanday choralar haqida gap ketayotganiga aniqlik kiritilmagan — ushbu choralarni endi Rossiya hukumati ishlab chiqishi lozim. Shuningdek, farmon bilan ushbu choralar tatbiq etiladigan jismoniy va yuridik shaxslar ro‘yxatini tuzishga doir topshiriq ham berilgan.
Farmon 22-oktabrdan kuchga kirgan. Farmonda alohida qayd etilishicha, agar Ukraina Rossiya fuqarolari va yuridik shaxslariga nisbatan “cheklovchi choralari”dan voz kechsa, ushbu farmonning amal qilishi bekor bo‘ladi.
Hozirgi vaqtda Ukrainaning sanksiya ro‘yxatlarida 1700 ga yaqin jismoniy shaxs va 700 ga yaqin yuridik shaxs bor; ularning aksariyati — Rossiyadan.
Ma’lumot uchun, Vladimir Putin iyun oyida AQSh va boshqa mamlakatlarning “do‘stona bo‘lmagan harakatlari”ga javoban sanksiyalar to‘g‘risidagi qonunni imzolagan edi.
Izoh (0)