Buyuk Britaniyadagii qushlar himoyachilari Atlantikadagi orolda ulkan sichqonlarni yo‘q qilishga va’da berdi

Qushlar himoyasi bo‘yicha Buyuk Britaniya qirollik jamiyati 2020-yilgacha Janubiy Atlantikadagi Gof orolidagi barcha sichqonlarni yo‘q qilish majburiyatini oldi. Orol dunyodagi dengiz qushlarining eng katta koloniyalaridan biri hisoblanadi. Qushlarga kemiruvchilar tahdid solmoqda, deb yozadi “RIA Novosti”.

Tristan-da-Kunya arxipelagi tarkibidagi Gof oroliga dengizchilar XIX asrning oxirida tasodifan uy sichqonini olib borgan. Ekologlarning xabar qilishicha, 100 yildan ortiq vaqt ichida sichqonlar nafaqat orolni to‘liq egalladi, balki ularning o‘lchamlari Yevropadagi qarindoshlarinikiga nisbatan kamida bir yarim martaga kattalashdi.

Ulkan sichqonlar populyatsiyasi odam yashamaydigan mazkur orolda taxminan 700 mingta sichqondan iborat. Hayvonlar himoyachilarining ma’lumotlariga ko‘ra, kemiruvchilar har yili kamida ikki millionta dengiz qushini yo‘q qiladi. Kuzatuvlarning ko‘rsatishicha, hujum qilish uchun kemiruvchilar 10 tagacha sichqondan iborat otryadga birlashadi va qushni tirikligicha yeb qo‘yadi.