Россия президенти Владимир Путин Украинанинг дўстона бўлмаган ҳаракатлари муносабати билан ушбу мамлакатга нисбатан «махсус иқтисодий чоралар» татбиқ этишни назарда тутувчи фармонни имзолади. Бу ҳақда Кремль сайтида маълумот берилган.

Фармонда айнан қандай чоралар ҳақида гап кетаётганига аниқлик киритилмаган — ушбу чораларни энди Россия ҳукумати ишлаб чиқиши лозим. Шунингдек, фармон билан ушбу чоралар татбиқ этиладиган жисмоний ва юридик шахслар рўйхатини тузишга доир топшириқ ҳам берилган.

Фармон 22 октябрдан кучга кирган. Фармонда алоҳида қайд этилишича, агар Украина Россия фуқаролари ва юридик шахсларига нисбатан «чекловчи чоралари»дан воз кечса, ушбу фармоннинг амал қилиши бекор бўлади.

Ҳозирги вақтда Украинанинг санкция рўйхатларида 1700 га яқин жисмоний шахс ва 700 га яқин юридик шахс бор; уларнинг аксарияти — Россиядан.

Маълумот учун, Владимир Путин июнь ойида АҚШ ва бошқа мамлакатларнинг «дўстона бўлмаган ҳаракатлари»га жавобан санкциялар тўғрисидаги қонунни имзолаган эди.