“Yoshlar press-klubi”da qisqa metrajli filmlar va videoroliklar, “Izhor” she’r va hikoyalar, “Yosh qo‘shiq ijrochilari” Respublika tanlovlari g‘oliblarini tantanali taqdirlash hamda “Yoshlar kutubxonasi” loyihasining taqdimot marosimi bo‘lib o‘tdi. Bu haqda “Daryo”ga Yoshlar media markazi ma’lum qildi.
“Izhor” tanloviga 35 yoshgacha bo‘lgan ijodkorlarning 400 ga yaqin she’r va hikoyalari taqdim etildi. Ekspertlar xulosasiga ko‘ra, 10 nafar ishtirokchi g‘olib deb topildi va ular munosib taqdirlandi.
Nazm yo‘nalishida g‘oliblikka Termiz Davlat universiteti talabasi Nargiza Odinayeva, To‘raqo‘rg‘on Sanoat va transport kasb-hunar kolleji talabasi Gulshoda Husniddinova, “Xalq irodasi” gazetasi muxbiri Mohira Habibullayeva, erkin ijodkor Ravshan Husan hamda Nukus shahridagi 20-sonli umumta’lim maktabi 9-sinf o‘quvchisi Ulbo‘sin Abdugaliyeva munosib deb topildi.
Nasr yo‘nalishida mukofotlar O‘zbekiston Milliy kutubxonasi xodimi Javlon Jovliyev, Bayram Ali Qo‘ldoshev, Boyovut tumani 9-umumta’lim maktabi o‘qituvchisi Gulnoza Mamarasulova, Farg‘ona politexnika instituti talabasi Asliddin To‘lanov va Navoiy davlat pedagogika instituti talabasi Nilufar Obidovaga nasib etdi.
“Yoshlar tarbiyasiga ijobiy ta’sir ko‘rsatadigan qisqa metrajli filmlar va videoroliklar” tanlovida esa 30 yoshgacha bo‘lgan 130 nafardan ortiq professional va havaskor yoshlar taqdim etgan ijtimoiy rolik, qisqa metrajli film va adabiy-badiiy ssenariylar ko‘rib chiqildi.
Tanlov yakuniga ko‘ra, 8 nafar professional va havaskor ijodkorlar g‘olib deb topildi. Qisqa metrajli filmlar yo‘nalishi bo‘yicha 1-o‘rinni Shokir Xoliqovning “Choy”, 2-o‘rinni Mars O‘rinbosarovning “Saboq”, 3-o‘rinni Ravshan Nurmuhammedovning “Ustoz” filmi qo‘lga kiritdi.
Ijtimoiy roliklar bo‘yicha Ravshan esa Nurmuhammedovning “Yosh tadbirkor” va Nurmuhammed Jumag‘ulovning “Kelajak egasining iltimosi” roliklari g‘olib bo‘ldi.
Ssenariylar yo‘nalishida Muhammadxon Yusupov, Otabek Yo‘ldoshev va Azizbek Qurbonovning ssenariylari mukofotli o‘rinlarga munosib ko‘rildi. Mazkur tanlov endi har yili o‘tkazilib, yosh iste’dod sohiblari ijodini qo‘llab-quvvatlash bilan birga ularning loyihalari asosida yaratilgan filmlar mahalliy va nufuzli xalqaro kinofestivallarga tavsiya qilib boradi.
Tadbir davomida “Yosh qo‘shiq ijrochilari” festivali g‘oliblari ham taqdirlandi. Mazkur festival 7 yoshdan 30 yoshgacha bo‘lgan yoshlar o‘rtasida mumtoz, estrada, akademik (opera), baxshichilik yo‘nalishlarida o‘tkazildi.
Tanlovning mahalliy saralash bosqichlariga 250 ming nafar yosh qamrab olindi. “Yosh qo‘shiq ijrochilari” festivalining Gran-Pri sohibi Kamila Amirovaga Prezident sovrini — 5 million so‘m miqdordagi pul mukofoti topshirildi.
Tadbirda “Yoshlar kutubxonasi” loyihasi taqdimoti o‘tkazildi. Joriy yilda Yoshlar ittifoqi markaziy kengashi tomonidan loyiha uchun 10 milliard so‘m mablag‘ ajratilgan. Loyiha doirasida har bir kitob kamida 10 ming nusxada chop etilib, respublikadagi barcha maktab, kollej, akademik litsey va oliy ta’lim muassasalari kutubxonalariga bepul tarqatilishi belgilangan.
Ayni paytda Yoshlar ittifoqi 27 nomdagi adabiyotlarni nashr ettirdi. 10 nomdagi jahon va o‘zbek adabiyotidagi nodir asarlar nashrga tayyorlandi. 2018-yil oxiriga qadar har bir ta’lim muassasasi kutubxonasiga 100 nomdagi badiiy kitob yetkazib berilishi rejalashtirilgan.
Izoh (0)