«Ёшлар пресс-клуби»да қисқа метражли фильмлар ва видеороликлар, «Изҳор» шеър ва ҳикоялар, «Ёш қўшиқ ижрочилари» Республика танловлари ғолибларини тантанали тақдирлаш ҳамда «Ёшлар кутубхонаси» лойиҳасининг тақдимот маросими бўлиб ўтди. Бу ҳақда «Дарё»га Ёшлар медиа маркази маълум қилди.
«Изҳор» танловига 35 ёшгача бўлган ижодкорларнинг 400 га яқин шеър ва ҳикоялари тақдим этилди. Экспертлар хулосасига кўра, 10 нафар иштирокчи ғолиб деб топилди ва улар муносиб тақдирланди.
Назм йўналишида ғолибликка Термиз Давлат университети талабаси Наргиза Odinаева, Тўрақўрғон Саноат ва транспорт касб-ҳунар коллежи талабаси Гулшода Ҳусниддинова, «Халқ иродаси» газетаси мухбири Моҳира Ҳабибуллаева, эркин ижодкор Равшан Ҳусан ҳамда Нукус шаҳридаги 20-сонли умумтаълим мактаби 9-синф ўқувчиси Улбўсин Абдугалиева муносиб деб топилди.
Наср йўналишида мукофотлар Ўзбекистон Миллий кутубхонаси ходими Жавлон Жовлиев, Байрам Али Қўлдошев, Боёвут тумани 9-умумтаълим мактаби ўқитувчиси Гулноза Мамарасулова, Фарғона политехника институти талабаси Аслиддин Тўланов ва Навоий давлат педагогика институти талабаси Нилуфар Обидовага насиб этди.
«Ёшлар тарбиясига ижобий таъсир кўрсатадиган қисқа метражли фильмлар ва видеороликлар» танловида эса 30 ёшгача бўлган 130 нафардан ортиқ профессионал ва ҳаваскор ёшлар тақдим этган ижтимоий ролик, қисқа метражли фильм ва адабий-бадиий сценарийлар кўриб чиқилди.
Танлов якунига кўра, 8 нафар профессионал ва ҳаваскор ижодкорлар ғолиб деб топилди. Қисқа метражли фильмлар йўналиши бўйича 1-ўринни Шокир Холиқовнинг «Чой», 2-ўринни Марс Ўринбосаровнинг «Сабоқ», 3-ўринни Равшан Нурмуҳаммедовнинг «Устоз» фильми қўлга киритди.
Ижтимоий роликлар бўйича Равшан эса Нурмуҳаммедовнинг «Ёш тадбиркор» ва Нурмуҳаммед Жумағуловнинг «Келажак эгасининг илтимоси» роликлари ғолиб бўлди.
Сценарийлар йўналишида Муҳаммадхон Юсупов, Отабек Йўлдошев ва Азизбек Қурбоновнинг сценарийлари мукофотли ўринларга муносиб кўрилди. Мазкур танлов энди ҳар йили ўтказилиб, ёш истеъдод соҳиблари ижодини қўллаб-қувватлаш билан бирга уларнинг лойиҳалари асосида яратилган фильмлар маҳаллий ва нуфузли халқаро кинофестивалларга тавсия қилиб боради.
Тадбир давомида «Ёш қўшиқ ижрочилари» фестивали ғолиблари ҳам тақдирланди. Мазкур фестиваль 7 ёшдан 30 ёшгача бўлган ёшлар ўртасида мумтоз, эстрада, академик (опера), бахшичилик йўналишларида ўтказилди.
Танловнинг маҳаллий саралаш босқичларига 250 минг нафар ёш қамраб олинди. «Ёш қўшиқ ижрочилари» фестивалининг Гран-При соҳиби Камила Амировага Президент соврини — 5 миллион сўм миқдордаги пул мукофоти топширилди.
Тадбирда «Ёшлар кутубхонаси» лойиҳаси тақдимоти ўтказилди. Жорий йилда Ёшлар иттифоқи марказий кенгаши томонидан лойиҳа учун 10 миллиард сўм маблағ ажратилган. Лойиҳа доирасида ҳар бир китоб камида 10 минг нусхада чоп этилиб, республикадаги барча мактаб, коллеж, академик лицей ва олий таълим муассасалари кутубхоналарига бепул тарқатилиши белгиланган.
Айни пайтда Ёшлар иттифоқи 27 номдаги адабиётларни нашр эттирди. 10 номдаги жаҳон ва ўзбек адабиётидаги нодир асарлар нашрга тайёрланди. 2018 йил охирига қадар ҳар бир таълим муассасаси кутубхонасига 100 номдаги бадиий китоб етказиб берилиши режалаштирилган.
Изоҳ (0)