Umumta’lim maktablarida bitta sinfdagi o‘quvchilar soni 35 tadan oshmasligi kerak. Bu haqda Xalq ta’limi vaziri Sherzod Shermatov Xalqaro press klubning tizimdagi muammolar tahliliga bag‘ishlab o‘tkazilgan sessiyasida ma’lum qildi, deb xabar beradi “Daryo” muxbiri Sevara Nishonova.
“O‘quvchilar soni yaxshi ta’lim beriladigan maktablarda ko‘p bo‘lishi kuzatilmoqda. Toshkent shahrida 300 dan ortiq maktab bo‘lsa, 200 tasida koeffitsent ikkidan yuqori hamda o‘quvchi soni sinfda juda ko‘p. Buning sababi nima? Ota-onalar o‘zining mikrouchastkasidagi maktabga emas, aynan sifatli ta’lim beriladigan maktabga farzandini berishga harakat qiladi. Qonunchilikda bu borada cheklov mavjud, sinfda bola soni 35 tadan oshishi kerak emas. Lekin ota-onalar iltimos qilib, albatta o‘sha sinfga tiqishtirishga harakat qilishadi. Ularni ham tushunsa bo‘ladi, chunki hamma farzandiga yaxshi ta’lim berishga harakat qiladi.
Buyoqda yana 100 ta maktab bor, ularning koeffitsenti birga ham chiqmaydi. Ya’ni bu maktablar 1000 ta o‘quvchiga mo‘ljallangan bo‘lsa-da, bor-yo‘g‘i 300—400 nafar o‘quvchi o‘qiydi. Shuning uchun hozirda biz maktab direktorlari o‘rtasida o‘ziga xos raqobatni yuzaga keltirdik. Qaysi maktab direktori koeffitsentini birga yetkazmasdan bir yildan ko‘proq ishlayotgan bo‘lsa, uning lavozimiga munosiblik masalasi ko‘rib chiqiladi”, — deydi Sherzod Shermatov.
Vazirning ta’kidlashicha, Toshkent shahrida tobora rus tilida ta’lim beruvchi maktablarga bo‘lgan talab ortib bormoqda. Yangi o‘quv yilida poytaxt aholisining qariyb yarmi farzandini rus maktablarga bergan. Rus tilida ta’lim beruvchi kadrlar yetishmasligi ham katta muammolardan biri hisoblanadi.
Izoh (0)