Умумтаълим мактабларида битта синфдаги ўқувчилар сони 35 тадан ошмаслиги керак. Бу ҳақда Халқ таълими вазири Шерзод Шерматов Халқаро пресс клубнинг тизимдаги муаммолар таҳлилига бағишлаб ўтказилган сессиясида маълум қилди, деб хабар беради «Дарё» мухбири Севара Нишонова.
«Ўқувчилар сони яхши таълим бериладиган мактабларда кўп бўлиши кузатилмоқда. Тошкент шаҳрида 300 дан ортиқ мактаб бўлса, 200 тасида коэффицент иккидан юқори ҳамда ўқувчи сони синфда жуда кўп. Бунинг сабаби нима? Ота-оналар ўзининг микроучасткасидаги мактабга эмас, айнан сифатли таълим бериладиган мактабга фарзандини беришга ҳаракат қилади. Қонунчиликда бу борада чеклов мавжуд, синфда бола сони 35 тадан ошиши керак эмас. Лекин ота-оналар илтимос қилиб, албатта ўша синфга тиқиштиришга ҳаракат қилишади. Уларни ҳам тушунса бўлади, чунки ҳамма фарзандига яхши таълим беришга ҳаракат қилади.
Буёқда яна 100 та мактаб бор, уларнинг коэффиценти бирга ҳам чиқмайди. Яъни бу мактаблар 1000 та ўқувчига мўлжалланган бўлса-да, бор-йўғи 300—400 нафар ўқувчи ўқийди. Шунинг учун ҳозирда биз мактаб директорлари ўртасида ўзига хос рақобатни юзага келтирдик. Қайси мактаб директори коэффицентини бирга етказмасдан бир йилдан кўпроқ ишлаётган бўлса, унинг лавозимига муносиблик масаласи кўриб чиқилади», — дейди Шерзод Шерматов.
Вазирнинг таъкидлашича, Тошкент шаҳрида тобора рус тилида таълим берувчи мактабларга бўлган талаб ортиб бормоқда. Янги ўқув йилида пойтахт аҳолисининг қарийб ярми фарзандини рус мактабларга берган. Рус тилида таълим берувчи кадрлар етишмаслиги ҳам катта муаммолардан бири ҳисобланади.
Изоҳ (0)