24-avgust kuni Xalqaro press-klubning “Maktab ta’limi: islohotlarning yangi bosqichidagi muhim o‘zgarishlar va muammolar tahlili” mavzusidagi navbatdagi sessiyasi bo‘lib o‘tdi. Bu haqda “Daryo” muxbiri Sevara Nishonova xabar berdi.
Sessiyada xalq ta’limi vazirligi rahbariyati ishtirok etdi hamda tizimni rivojlantirish yuzasidan olib borilayotgan chora-tadbirlar yuzasidan ma’lumot berildi. Shuningdek, maktab o‘qituvchilarining oyligi qancha bo‘lishiga ham batafsil izoh berildi.
Hozirgi kunda o‘qituvchilarga klassifikatsiyasiga qarab oylik beriladi. Aniqlashimizcha, yuqori sinf o‘qituvchilarining oyligi boshlang‘ich sinf o‘qituvchilarinikiga nisbatan kam ekan.Xalq ta’limi vaziri o‘rinbosari Otabek Nazirovning ma’lum qilishicha, vazirlik tizimdagi muammolarni hal qilishni o‘qituvchilar oyligini oshirishdan boshlagan.Masalan, oliy toifali yuqori sinf o‘qituvchilarining oyligi soliqlardan tashqari, hamma ustama to‘lovlari bilan 1 million 529 ming so‘mni tashkil etadi. 1-sentabrdan oliy toifali yuqori sinf o‘qituvchilarining oyligi 24 foizga oshirilib, 1 million 749 ming so‘mni tashkil etadi. 2019-yilning 1-yanvaridan esa oliy toifali yuqori sinf o‘qituvchilari 2 million 501 ming so‘m oylik ola boshlaydi. Ya’ni ularning oyligi o‘rtacha 64 foizga oshishi kutilmoqda.
Yangi soliq konsepsiyasiga ko‘ra, ushlab qolinadigan soliqlar kamayadi va o‘qituvchilarning qo;liga oladigan oyligi ko‘tarilishi nazarda tutiladi.
Boshlang‘ich sinf o‘qituvchilari hozirda 1 million 622 ming so‘m olsa, yanvardan ularning ham oyligi 2,5 millionga chiqadi. O‘rtacha hisobda qo‘liga oladigan summasi 54 foizga oshishi kutilmoqda.
Umum-ta’lim maktablarida oylikning eng ko‘p oshishi psixologlarda kuzatiladi. Ularning oyligi shu paytgacha juda kam bo‘lgan, aniqrog‘i bu ko‘rsatkich 626 ming so‘mni tashkil etgan. 2019-yilning 1-yanvaridan maktab psixologlarining oyligi 93 foizga oshib, 1 million 232 ming so‘mni tashkil etadi. Psixologlarga alohida e’tibor qaratilmoqda. 10—11-sinfda o‘qiydigan o‘quvchilar ayni qiziqqon yoshda bo‘lgani uchun, ularga psixologning ko‘magi kerak bo‘ladi. Biroq shu paytgacha sohada psixologlarga e’tibor qaratilmagan. Oyligi past, psixolog shtati juda kam bo‘lgan, ba’zi maktablarda esa umuman bo‘lmagan.
Sherzod Shermatov, Xalq ta’limi vaziri
“O‘tgan yillarda O‘zbekistonda xalq ta’limi vazirligi budjetidan o‘qituvchilarning maoshini oshirish uchun 15—16 foiz miqdorida mablag‘ ajratib kelingan. Bu kichkina raqam emas. Bu 10 trillion so‘m atrofida degani. Lekin shunga qaramay biz o‘zaro tahlilllar natijasida o‘qituvchilarnig oyligi juda kam bo‘lganini aniqladik. Agar oylik masalasi hal etilmas ekan, tizimdagi muammolarni qanday hal qilamiz, degan qarorga keldik”, — deydi Otabek Nazirov.
Izoh (0)