Ichki ishlar vaziri, general-mayor Po‘lat Bobojonov rahbarligidagi ishchi guruh joriy yilning 5—9-avgust kunlari Qoraqalpog‘iston Respublikasining barcha shahar va tumanlarida o‘rganish ishlarini olib bordi. Bu haqda IIV jamoatchilik va OAV bilan aloqalar boshqarmasi xabar berdi.
Po‘lat Bobojonov Muynoq, Qo‘ng‘irot, Taxtako‘pir, Qorao‘zak, Chimboy, Kegeyli va Nukus tuman IIBlarining shaxsiy tarkibi bilan shaxsan uchrashdi. Uchrashuvlarda xodimlarning ma’naviy yetukligi va huquqiy savodxonligi, rahbar va xodimlarning xizmat vazifalari ijrosini tashkil etish samaradorligi, tartib-intizomga rioya etish, aholidan kelib tushgan murojaatlarning o‘z vaqtida va sifatli ko‘rib chiqilishi ahvoli, faoliyatning har bir sohaviy yo‘nalishida mavjud kamchilik va muammolar, hududlarning jadal ijtimoiy-iqtisodiy rivojlanishini ta’minlashga doir ustuvor vazifalar ijrosi doirasida sektorlarda bajarilgan ishlar va sohaga oid boshqa dolzarb masalalar muhokama qilindi.
Shuningdek, Ichki ishlar vaziri Nukus shahar Ichki ishlar organlari faoliyatini muvofiqlashtirish boshqarmasiga qarashli 2-sonli IIBning to‘liq ta’mirlangan binosini foydalanishga topshirish marosimida ishtirok etdi.
9-avgust kuni Nukus shahrida Ichki ishlar vaziri raisligida hududlarda o‘tkazilgan o‘rganishlarning yakuniga bag‘ishlangan kengaytirilgan yig‘ilish bo‘lib o‘tdi. Unda Prezident devoni, Bosh prokuratura, Qorakalpog‘iston Respublikasi Vazirlar Kengashi va ichki ishlar organlari mas’ul xodimlari ishtirok etdi.
Majlisda qayd etilganidek, respublikada joriy yilning 7 oyi mobaynida umumiy jinoyatchilik sezilarli darajada kamaygan bo‘lsada, Qo‘ng‘irot, Qonliko‘l, To‘rtko‘l va Chimboy tumanlarida qotillik, Nukus shahri, Taxiatosh, Kegeyli, Nukus, To‘rtko‘l va Chimboy tumanlarida og‘ir tan jarohati yetkazish jinoyatlari ko‘paygan.
Mahallalarda fuqarolar o‘rtasidagi o‘zaro kelishmovchiliklar va ularni o‘z vaqtida bartaraf etish choralari ko‘rilishiga jiddiy va mas’uliyatli yondashilmayotganligi oqibatida 4 ta qotillik va 25 ta og‘ir tan jarohati yetkazish jinoyatlari oila-turmush munosabatlari doirasida sodir etilgan.
To‘rtko‘l, Qo‘ng‘irot, Ellikqal’a tumanlari va Nukus shahrida joriy yilning iyun va iyul oylarining o‘zida sodir etilgan jinoyat qidiruv yo‘nalishidagi jinoyatlar soni keskin oshganligi, Nukus shahri, To‘rtko‘l, Amudaryo, Xo‘jayli, Beruniy va Qo‘ng‘irot tumanlarida ilgari sudlanganlar bilan manzilli profilaktik tadbirlar hamda ularning bandligini ta’minlash choralari talab darajasida olib borilmayotganligi alohida ta’kidlandi.
Shuningdek, Nukus shahrida “Xalqlar do‘stligi”, “Do‘stlik”, “Tasliq”, “Mustaqillik” va “Qizilqum” mahallalarida sodir etilgan jinoyatlar shahar bo‘yicha qayd etilgan jinoyatlarning 25 foizini tashkil etishi, ushbu mahallalar hududida shahar uchun ahamiyatli bo‘lgan xo‘jalik, boshqaruv, ijtimoiy va savdo obyektlar joylashgan bo‘lsada, ularni qo‘riqlash sohasida zamonaviy texnologiyalardan foydalanish amaliyoti susaytirib yuborilganligi Ichki ishlar vaziri tomonidan qattiq tanqid ostiga olindi.
Yig‘ilishda sohada amalga oshirilayotgan islohotlarning mohiyatini to‘laqonli anglab yetmasdan, bugungi kun talablariga javob bermaydigan, hanuz eskicha ish uslubi bilan ishlayotgan, fuqarolarning manfaati yo‘lida jonbozlik ko‘rsatmayotgan rahbar xodimlarga nisbatan intizomiy ta’sir choralari ko‘rildi.
Xususan, xizmat vazifasiga loqaydlik va sustkashlik bilan munosabatda bo‘lib, xizmatni samarali tashkil etish choralarini ko‘rmaganligi, faoliyati davomida tizimli kamchiliklarga yo‘l qo‘yib kelganligi uchun To‘rtko‘l tumani IIB boshlig‘i A.Ilyasov, Nukus shahar va Taxiatosh tumani IIBlari boshliqlarining birinchi o‘rinbosarlari A.Artikov va A.Gulimbetov, Nukus shahar, Chimboy va Qorao‘zak tumanlari IIBlari boshliqlarining yoshlar masalalari bo‘yicha o‘rinbosarlari N.Qdirbayev, R.Paulaniyazov va R.Qalandarov hamda Kegeyli tumani IIB 10-sonli ichki ishlar bo‘linmasi boshlig‘i A.Palibekov egallab turgan lavozimlaridan ozod etildi.
Bundan tashqari, qator rahbarlarga nisbatan turli darajadagi intizomiy jazo choralari qo‘llanildi.
Shuningdek, yig‘ilishda fuqarolarning huquq va manfatlarini himoya qilish, qonuniylikni ta’minlash yo‘lida xizmat vazifalarini sidqidildan bajarib kelayotgan xodimlar ham alohida ko‘rsatib o‘tildi. Jumladan, o‘zlariga pora taklif etilganligi holatlari to‘g‘risida axborot berib, ichki ishlar organi xodimining qasamyodiga sodiq qolgan Qorao‘zak tumani IIB boshlig‘ining birinchi o‘rinbosari P.Iskenderov va Ellikqal’a tumani IIB tezkor vakili J.Mambetov vazir tomonidan rag‘batlantirilib, ularga pul mukofotlari topshirildi.
Izoh (0)