“Hujradagi zulmat”: O‘zTVda O‘zbekistondagi xufyona hujralar va Suriyadagi o‘zbek jangarilar haqida maxsus film ko‘rsatildi (video)

O‘zMTRKning “O‘zbekiston 24” telekanali orqali 12-avgust kuni, Davlat xavfsizlik xizmati bilan hamkorlikda tayyorlangan “Hujradagi zulmat” nomli maxsus film efirga uzatildi. Filmda noqonuniy diniy ta’lim berish faoliyati tanqid qilingan va uning oqibatlari ko‘rsatib berilgan.

Filmda keltirilgan ma’lumotlarga ko‘ra, 2017-yil davomida O‘zbekistonda noqonuniy diniy ta’lim berish faoliyati uchun yo‘naltirilgan 33 ta xufyona hujra aniqlangan. 2018-yilning birinchi yarmida esa ko‘rsatkich 116 tani tashkil etgan.

Bunday hujralarni tashkil etganlar orasida bir yil avval Prezident tashabbusi bilan 18 ming kishilik “maxsus ro‘yxat”lardan chiqarilgan fuqarolar borligi film davomida qoralangan.

Filmning so‘nggi qismida Suriyadagi jangovar harakatlarda qatnashib, so‘ng qo‘lga tushgan o‘zbekistonlik yigitlarning intervyulari, shuningdek, farzandlari Suriyada halok bo‘lgan yoki bedarak yo‘qolgan o‘zbekistonlik onalarning ko‘z yoshlariga to‘la chiqishlari ko‘rsatilgan.