Ички ишлар вазири, генерал-майор Пўлат Бобожонов раҳбарлигидаги ишчи гуруҳ жорий йилнинг 5—9 август кунлари Қорақалпоғистон Республикасининг барча шаҳар ва туманларида ўрганиш ишларини олиб борди. Бу ҳақда ИИВ жамоатчилик ва ОАВ билан алоқалар бошқармаси хабар берди.
Пўлат Бобожонов Муйноқ, Қўнғирот, Тахтакўпир, Қораўзак, Чимбой, Кегейли ва Нукус туман ИИБларининг шахсий таркиби билан шахсан учрашди. Учрашувларда ходимларнинг маънавий етуклиги ва ҳуқуқий саводхонлиги, раҳбар ва ходимларнинг хизмат вазифалари ижросини ташкил этиш самарадорлиги, тартиб-интизомга риоя этиш, аҳолидан келиб тушган мурожаатларнинг ўз вақтида ва сифатли кўриб чиқилиши аҳволи, фаолиятнинг ҳар бир соҳавий йўналишида мавжуд камчилик ва муаммолар, ҳудудларнинг жадал ижтимоий-иқтисодий ривожланишини таъминлашга доир устувор вазифалар ижроси доирасида секторларда бажарилган ишлар ва соҳага оид бошқа долзарб масалалар муҳокама қилинди.
Шунингдек, Ички ишлар вазири Нукус шаҳар Ички ишлар органлари фаолиятини мувофиқлаштириш бошқармасига қарашли 2-сонли ИИБнинг тўлиқ таъмирланган биносини фойдаланишга топшириш маросимида иштирок этди.
9 август куни Нукус шаҳрида Ички ишлар вазири раислигида ҳудудларда ўтказилган ўрганишларнинг якунига бағишланган кенгайтирилган йиғилиш бўлиб ўтди. Унда Президент девони, Бош прокуратура, Қоракалпоғистон Республикаси Вазирлар Кенгаши ва ички ишлар органлари масъул ходимлари иштирок этди.
Мажлисда қайд этилганидек, республикада жорий йилнинг 7 ойи мобайнида умумий жиноятчилик сезиларли даражада камайган бўлсада, Қўнғирот, Қонликўл, Тўрткўл ва Чимбой туманларида қотиллик, Нукус шаҳри, Тахиатош, Кегейли, Нукус, Тўрткўл ва Чимбой туманларида оғир тан жароҳати етказиш жиноятлари кўпайган.
Маҳаллаларда фуқаролар ўртасидаги ўзаро келишмовчиликлар ва уларни ўз вақтида бартараф этиш чоралари кўрилишига жиддий ва масъулиятли ёндашилмаётганлиги оқибатида 4 та қотиллик ва 25 та оғир тан жароҳати етказиш жиноятлари оила-турмуш муносабатлари доирасида содир этилган.
Тўрткўл, Қўнғирот, Элликқалъа туманлари ва Нукус шаҳрида жорий йилнинг июнь ва июль ойларининг ўзида содир этилган жиноят қидирув йўналишидаги жиноятлар сони кескин ошганлиги, Нукус шаҳри, Тўрткўл, Амударё, Хўжайли, Беруний ва Қўнғирот туманларида илгари судланганлар билан манзилли профилактик тадбирлар ҳамда уларнинг бандлигини таъминлаш чоралари талаб даражасида олиб борилмаётганлиги алоҳида таъкидланди.
Шунингдек, Нукус шаҳрида «Халқлар дўстлиги», «Дўстлик», «Таслиқ», «Мустақиллик» ва «Қизилқум» маҳаллаларида содир этилган жиноятлар шаҳар бўйича қайд этилган жиноятларнинг 25 фоизини ташкил этиши, ушбу маҳаллалар ҳудудида шаҳар учун аҳамиятли бўлган хўжалик, бошқарув, ижтимоий ва савдо объектлар жойлашган бўлсада, уларни қўриқлаш соҳасида замонавий технологиялардан фойдаланиш амалиёти сусайтириб юборилганлиги Ички ишлар вазири томонидан қаттиқ танқид остига олинди.
Йиғилишда соҳада амалга оширилаётган ислоҳотларнинг моҳиятини тўлақонли англаб етмасдан, бугунги кун талабларига жавоб бермайдиган, ҳануз эскича иш услуби билан ишлаётган, фуқароларнинг манфаати йўлида жонбозлик кўрсатмаётган раҳбар ходимларга нисбатан интизомий таъсир чоралари кўрилди.
Хусусан, хизмат вазифасига лоқайдлик ва сусткашлик билан муносабатда бўлиб, хизматни самарали ташкил этиш чораларини кўрмаганлиги, фаолияти давомида тизимли камчиликларга йўл қўйиб келганлиги учун Тўрткўл тумани ИИБ бошлиғи А.Илясов, Нукус шаҳар ва Тахиатош тумани ИИБлари бошлиқларининг биринчи ўринбосарлари А.Артиков ва А.Гулимбетов, Нукус шаҳар, Чимбой ва Қораўзак туманлари ИИБлари бошлиқларининг ёшлар масалалари бўйича ўринбосарлари Н.Қдирбаев, Р.Пауланиязов ва Р.Қаландаров ҳамда Кегейли тумани ИИБ 10-сонли ички ишлар бўлинмаси бошлиғи А.Палибеков эгаллаб турган лавозимларидан озод этилди.
Бундан ташқари, қатор раҳбарларга нисбатан турли даражадаги интизомий жазо чоралари қўлланилди.
Шунингдек, йиғилишда фуқароларнинг ҳуқуқ ва манфатларини ҳимоя қилиш, қонунийликни таъминлаш йўлида хизмат вазифаларини сидқидилдан бажариб келаётган ходимлар ҳам алоҳида кўрсатиб ўтилди. Жумладан, ўзларига пора таклиф этилганлиги ҳолатлари тўғрисида ахборот бериб, ички ишлар органи ходимининг қасамёдига содиқ қолган Қораўзак тумани ИИБ бошлиғининг биринчи ўринбосари П.Искендеров ва Элликқалъа тумани ИИБ тезкор вакили Ж.Мамбетов вазир томонидан рағбатлантирилиб, уларга пул мукофотлари топширилди.
Изоҳ (0)