Oliy va o‘rta maxsus ta’lim vazirligida Yaponiya Xalqaro hamkorlik agentligi (Japan International Cooperation Agency — JICA) vakillaridan iborat delegatsiya rasmiy qabul qilindi. Bu haqda vazirlik axborot xizmati ma’lum qildi.
Uchrashuvda Yaponiya Xalqaro hamkorlik agentligining O‘zbekistondagi vakolatxonasi rahbari Muneo Takasaka hamda Oliy va o‘rta maxsus ta’lim vaziri Inom Majidov tomonidan jami 262 million iyena (2,3 million dollardan ortiq) miqdoridagi grant kelishuvi imzolandi
Mazkur kelishuvga muvofiq Yaponiya hukumatining beg‘araz yordam dasturidagi “Kadrlar tayyorlash uchun stipendiyalar ajratish” loyihasi doirasida vazirlik va idoralar, tadqiqot muassasalari hamda davlat kompaniyalari xodimlarining o‘qishi tashkil etiladi.
Bunda magistratura va doktorantura dasturlari bo‘yicha iqtisod infrastrukturalarini takomillashtirish, biznes sohasi, qonunchilik tizimi, davlat mablag‘lari, qishloq xo‘jaligi va suv resurslari, aholi salomatligini saqlashni boshqarish yo‘nalishlarida tanlab olingan nomzodlar 2019—2022-yillarda ta’lim olish uchun Yaponiyaning nufuzli oliy o‘quv yurtlariga yuboriladi.
Loyihaning asosiy maqsadi O‘zbekistonga inson resurslarini rivojlantirishga ko‘maklashish hamda yosh davlat xizmatchilari uchun Yaponiyaning ilg‘or o‘quv yurtlarida magistratura yo‘nalishi bo‘yicha tahsil olish imkonini yaratishdan iborat. O‘tgan vaqt mobaynida jami 300 nafardan ortiq o‘zbekistonlik davlat xizmatchisi ushbu stipendiyaga sazovor bo‘lgan.
Izoh (0)