Sirdaryo viloyati Boyovut tumanida Janubiy Koreyaning NCG Enginiring kompaniyasining to‘g‘ridan to‘g‘ri investitsiyasi ishtirokida bunyod etiladigan sanoat zonasi va uning ishchi-xodimlariga mo‘ljallangan aholi punktiga tamal toshi qo‘yish marosimi bo‘lib o‘tdi. Bu haqda “Xalq so‘zi” xabar bermoqda.
Mazkur ishlab chiqarish hududida 100 dan ortiq korxona tashkil etiladi. Va unga 300 million AQSh dollari miqdoridagi to‘g‘ridan to‘g‘ri investitsiya yo‘naltiriladi. 2018—2023-yillarda to‘liq foydalanishga topshirilishi rejalashtirilgan sanoat hududida 10 mingdan ortiq ishchi o‘rni yaratiladi. Unda kosmetika, farmatsevtika, charm-poyabzal, oziq-ovqat sanoati kabi ko‘plab tarmoqlar liniyalari ishga tushiriladi. Barcha ishlab chiqarish jarayonlari yuqori texnologiyalar asosida yo‘lga qo‘yiladi.
E’tiborlisi, mas’uliyati cheklangan jamiyat shaklida faoliyat boshlagan “NCG Enginiring Boyovut” xususiy korxonasi uchun har jihatdan qulay hududdan yer maydoni ajratildi. Ya’ni ushbu joy yaqinida temir yo‘l, avtomagistral hamda yuqori kuchlanishli elektr quvvati kabi infratuzilma tarmoqlari mavjud.
Tadbirda Sirdaryo viloyati hokimi G‘ofurjon Mirzayev, NCG Enginiring kompaniyasi prezidenti Jang Il Kveon ishtirok etdi.
Izoh (0)