O‘zbekistonda 2010-yilda Mehribonlik uylari tarbiyalanuvchilarining ikki foizini mehnat muhojirlarining farzandlari tashkil etgan bo‘lsa, 2017-yilda bu raqam 6 foizga yetdi. Ya’ni, 250 nafarga yaqin bolaning ota-onasi farzandini davlat qaramog‘iga topshirib, daromad topish maqsadida chetga ketgan. Bu haqda “Xalq so‘zi” xabar bermoqda.
Ammo bu masalaning bir tomoni, xolos. Rasmiy ma’lumotlarga ko‘ra, bugungi kunda 2 milliondan ortiq o‘zbekistonlik boshqa davlatlarda mehnat muhojiri sanaladi. Ularning ortida oilasi, kimlargadir ishonib topshirib ketilgan farzandlari bor, albatta. Ota-onasi uzoqda mehnat qilayotgan bolalarning ta’limi, sog‘ligi va umuman hayoti masalasi O‘zbekistonda ish boshlagan yangi loyiha doirasida atroflicha tahlil qilinadi.
O‘zbekiston Xotin-qizlar qo‘mitasi, YuNISЕF, Yevropa ittifoqi ko‘magida tashkillangan migratsiya ta’siridan bolalarni himoyalash bo‘yicha loyiha taqdimotida bu haqda batafsil ma’lumot berildi. U Janubi-sharqiy va Janubiy Osiyo hamda Markaziy Osiyo mintaqalaridagi 8 mamlakat, jumladan, O‘zbekistonda amalga oshiriladi.
Loyiha asosan migrantlarning oilalarini ijtimoiy himoya qilish, vasiylik va homiylik organlari, davlat va notijorat tashkilotlarining bu boradagi faoliyatini muvofiqlashtirishga yo‘naltirilgan. Buning uchun respublikaning 4 viloyati tanlab olindi. Ya’ni, ayni paytda migrantlar soni nisbatan yuqori bo‘lgan Buxoro, Farg‘ona va Surxondaryo viloyatlarida 2020-yilning dekabriga qadar bosqichma bosqich amalga oshiriladi.
Loyiha doirasida mavzuga oid tadqiqotlar o‘tkazish, migrantlarning farzandlari duch kelayotgan muammolarni tizimli tahlil qilish ko‘zda tutilyapti. Bunday oilalarga o‘z vaqtida va kerakli yordamni tashkil etish yuzasidan zarur mexanizmlarni ishlab chiqish maqsad qilingan.
Izoh (0)