UzCard kobeyjing kartalari ustidagi ishni yakunladi, endi ularni chiqarish har bir bankdagi ichki jarayonlarga bog‘liq. Bu haqda Yagona umumrespublika protsessing markazi bosh direktori Ahror Mahmudov ma’lum qildi, deya xabar beradi Spot.
Mahmudovga ko‘ra, 10 kun mobaynida China Union Pay kartalari chiqarilishi kutilmoqda. Ular bir paytning o‘zida 4 ta bankda paydo bo‘ladi.
UzCard-Mastercard avgustga yaqin ikki bankda paydo bo‘ladi. Shuningdek, Visa bilan ham shartnoma imzolangan. Samarqandda sentabr oyida UzCard-Visa kobeyjing kartalari chiqarilishiga bag‘ishlangan konferensiya bo‘lib o‘tadi.
“O‘z tomonimizdan barcha texnik ishlarni bajardik. Hozirda banklar direktorlar kengashida kartalar turkumini xarid qilishni ma’qullash, ularni tayyorlashga buyurtma berish va yetkazishni ko‘zda tutuvchi ichki jarayonlarni yakunlamoqda. Bularning barchasi vaqt oladi, albatta. Bir necha bankda bu ishlarni yo‘lga qo‘yib olsak, qolganlariga bunday kartalarni joriy etish oson kechadi. Shu bilan birga, birinchilardan bo‘lib bu ishga qo‘l urganlar ko‘proq mijozlarga ega bo‘ladi”, — dedi A. Mahmudov.
Izoh (0)