Ўзбекистонда 2010 йилда Меҳрибонлик уйлари тарбияланувчиларининг икки фоизини меҳнат муҳожирларининг фарзандлари ташкил этган бўлса, 2017 йилда бу рақам 6 фоизга етди. Яъни, 250 нафарга яқин боланинг ота-онаси фарзандини давлат қарамоғига топшириб, даромад топиш мақсадида четга кетган. Бу ҳақда «Халқ сўзи» хабар бермоқда.
Аммо бу масаланинг бир томони, холос. Расмий маълумотларга кўра, бугунги кунда 2 миллиондан ортиқ ўзбекистонлик бошқа давлатларда меҳнат муҳожири саналади. Уларнинг ортида оиласи, кимларгадир ишониб топшириб кетилган фарзандлари бор, албатта. Ота-онаси узоқда меҳнат қилаётган болаларнинг таълими, соғлиги ва умуман ҳаёти масаласи Ўзбекистонда иш бошлаган янги лойиҳа доирасида атрофлича таҳлил қилинади.
Ўзбекистон Хотин-қизлар қўмитаси, ЮНИСЕФ, Европа иттифоқи кўмагида ташкилланган миграция таъсиридан болаларни ҳимоялаш бўйича лойиҳа тақдимотида бу ҳақда батафсил маълумот берилди. У Жануби-шарқий ва Жанубий Осиё ҳамда Марказий Осиё минтақаларидаги 8 мамлакат, жумладан, Ўзбекистонда амалга оширилади.
Лойиҳа асосан мигрантларнинг оилаларини ижтимоий ҳимоя қилиш, васийлик ва ҳомийлик органлари, давлат ва нотижорат ташкилотларининг бу борадаги фаолиятини мувофиқлаштиришга йўналтирилган. Бунинг учун республиканинг 4 вилояти танлаб олинди. Яъни, айни пайтда мигрантлар сони нисбатан юқори бўлган Бухоро, Фарғона ва Сурхондарё вилоятларида 2020 йилнинг декабрига қадар босқичма босқич амалга оширилади.
Лойиҳа доирасида мавзуга оид тадқиқотлар ўтказиш, мигрантларнинг фарзандлари дуч келаётган муаммоларни тизимли таҳлил қилиш кўзда тутиляпти. Бундай оилаларга ўз вақтида ва керакли ёрдамни ташкил этиш юзасидан зарур механизмларни ишлаб чиқиш мақсад қилинган.
Изоҳ (0)