Samarqand shahridagi “Yangiobod” mahallasida yashovchi oila do‘kon yuritib kelayotgan edi. Bu haqda “Samarkandskiy vestnik” xabar bermoqda.
O‘sha kuni ona do‘konni 14 yashar qiziga qoldirib, o‘g‘li bilan bozorga ketadi. Biroz vaqt o‘tgach, xaridor kirib keladi va sigareta xarid qiladi. 18 yashar yigit sigaretani shu yerning o‘zida tutatib olishni so‘raydi. Yoqilgan olov esa portlashga sabab bo‘ladi.
Tanasining 80 foizidan ortig‘i kuygan yigit va qiz respublika shoshilinch tibbiy yordam ilmiy markazi Samarqand filialining kuyish bo‘limiga yotqizildi. Biroq shifokorlarning urinishlari zoye ketdi.
O‘smirnning yuragi fojiadan uch kun o‘tib to‘xtadi. To‘rtinchi kuni qiz ham vafot etdi.
“Markazgazta’minot” UK bosh muhandisi X.Bobomurodovning so‘zlariga ko‘ra, voqea joyida ekspertiza o‘tkazildi. Tahlillar shuni ko‘rsatdiki, maishiy gaz trubalar korroziyaga uchragani tufayli sizib chiqqan.
— Mahallamiz hududida shimoliy taqsimlash stansiyasidan g‘isht zavodigacha gaz trubalari yotqizilgan, — deydi “Yangiobod” mahalla fuqarolar yig‘ini raisi U.Po‘latov. — Shu yerning o‘zidan yoqilg‘i quyish shoxobchalariga ham quvurlar tortilgan. Barcha quvurlar yuk mashinalar o‘tuvchi avtomobil yo‘li tagidan o‘tgan. Mutaxassislar gaz sizib chiqqan quvur teshigini topdi. Do‘kon gaz tarmoqlariga ulanmaganiga qaramay gaz tuproq orqali, balki kemiruvchilar inlaridan o‘tib, xonada to‘plangan. Yoqilgan sigareta portlashga sabab bo‘lgan. Bu voqeadan so‘ng “Biz porox ustida yashayotgandaymiz”, deb xavotirda qoldik. Axir, istalgan payt istalgan joydan gaz sizib chiqishi mumkin-da.
Nashrda keltirilishicha, voqea joyi hududidan ko‘plab gaz quvurlari o‘tgan. Teshik paydo bo‘lgan quvur Samarqand g‘isht zavodlaridan biriga tegishli. Ularda qoida bo‘yicha olib borilishi kerak bo‘lgan tekshirish ishlari oxirgi marta qachon o‘tkazilgani noma’lum. Demak, mahallada yashovchi deyarli 100 kishining xavfsizligiga kafolat yo‘q.
Izoh (0)