Afsona ketmoqda. Buffon rasman “Yuventus”ni tark etishini ma’lum qildi

Janluiji Buffon matbuot anjumani o‘tkazib, “Yuventus”dan ketayotgani haqida rasman e’lon qildi.

“Shanba kuni “Yuventus” safida oxirgi o‘yinimni o‘tkazaman. Hozir bu ajoyib sarguzashtlarni yakunlashning ayni vaqti. Futbolchi sifatida faoliyatimni davom ettirish uchun ham, boshqa ishda ham bir qancha takliflar oldim. Keyingi haftada yakuniy qarorimni hamma bilib oladi.Ayni damda esa kelajagim borasida turli bashoratlarga o‘rin yo‘q”, — dedi Buffon.

Buffon “Yuventus”ga 2001-yilda kelgan va jamoa bilan 9 bor Skudettoni qo‘lga kiritgan (yana ikkita chempionlik esa “Kalchopoli” ishi sabab olib qo‘yilgan). 4 bor Italiya kubogi, 5 bor mamlakat superkubogini qo‘lga kiritgan. 3 marta esa YChL finalida o‘ynagan, ammo bosh sovrinni boshi uzra ko‘tarish nasib etmadi.

Darvozabon joriy mavsum​ YChL 1/4 finali doirasida “Real”ga qarshi uchrashuvning so‘nggi daqiqalarida Maykl Oliverga aytgan so‘zlari uchun ham kechirim so‘radi.

“Men qizishib ketdim. Maykldan kechirim so‘rayman.Biroq o‘sha vaziyatda men o‘zimni bosa olmadim. Endi unga boshqa so‘z ayta olmayman. Men hakamni haqoratladim va undan bu harakatim uchun kechirishini so‘rayman”, — dedi Buffon.

Ma’lumot uchun Buffon “Real”ga qarshi javob o‘yinining so‘nggi daqiqalarida maydondan chetlatilgan edi.