Афсона кетмоқда. Буффон расман «Ювентус»ни тарк этишини маълум қилди

Жанлуижи Буффон матбуот анжумани ўтказиб, «Ювентус»дан кетаётгани ҳақида расман эълон қилди.

«Шанба куни «Ювентус» сафида охирги ўйинимни ўтказаман. Ҳозир бу ажойиб саргузаштларни якунлашнинг айни вақти. Футболчи сифатида фаолиятимни давом эттириш учун ҳам, бошқа ишда ҳам бир қанча таклифлар олдим. Кейинги ҳафтада якуний қароримни ҳамма билиб олади.Айни дамда эса келажагим борасида турли башоратларга ўрин йўқ», — деди Буффон.

Буффон «Ювентус»га 2001 йилда келган ва жамоа билан 9 бор Скудеттони қўлга киритган (яна иккита чемпионлик эса «Калчополи» иши сабаб олиб қўйилган). 4 бор Италия кубоги, 5 бор мамлакат суперкубогини қўлга киритган. 3 марта эса ЕЧЛ финалида ўйнаган, аммо бош совринни боши узра кўтариш насиб этмади.

Дарвозабон жорий мавсум​ ЕЧЛ 1/4 финали доирасида «Реал»га қарши учрашувнинг сўнгги дақиқаларида Майкл Оливерга айтган сўзлари учун ҳам кечирим сўради.

«Мен қизишиб кетдим. Майклдан кечирим сўрайман.Бироқ ўша вазиятда мен ўзимни боса олмадим. Энди унга бошқа сўз айта олмайман. Мен ҳакамни ҳақоратладим ва ундан бу ҳаракатим учун кечиришини сўрайман», — деди Буффон.

Маълумот учун Буффон «Реал»га қарши жавоб ўйинининг сўнгги дақиқаларида майдондан четлатилган эди.