Fransiya tomoni Suriyadagi vaziyatni tartibga solishda mamlakat prezidenti Bashar Asadning hokimiyatdan chetlatilishini boshqa talab qilib turib olmoqchi emas. Bu haqda Fransiyaning Rossiyadagi elchisi Silvi Bermann ma’lum qildi, deb yozadi “Gazeta.ru”.
“Biz Suriya xalqi nomidan qaror qabul qilmaymiz, ammo Bashar Asadning so‘zsiz ketishi haqidagi talabni boshqa ko‘tarmaymiz. Suriya milliy dialogining Sochidagi kongressida shakllangan va BMTning Suriya bo‘yicha maxsus vakili tomonidan ma’qullangan g‘oya yangi konstitutsiyani ishlab chiqish bilan shug‘ullanadigan konstitutsiya qo‘mitasini shakllantirishni ko‘zda tutardi. Ammo, menimcha, Suriya rejimi hozircha bu bilan shug‘ullangani yo‘q”, — dedi Bermann.
Shuningdek, u Rossiya va Fransiya tomoni Suriyadagi vaziyatni tartibga solish bo‘yicha ustuvor vazifalar borasida bir yoqadan bosh chiqarayotganini aytdi. Bunday vazifalar, uning so‘zlariga ko‘ra, gumanitar yordam bilan ta’minlash va siyosiy yechimni qidirishdan iborat.
Izoh (0)