O‘zbekiston va Rossiya Rossiyaning “Jukovskiy” aeroportidan amalga oshiriladigan parvozlar haqida kelishib oldi, deb yozadi Spot “Rosaviatsiya” saytiga tayanib.
Avvalroq 11-aprel kuni Moskvada O‘zbekiston va Rossiya aviatsiya ma’murlarining muzokaralari bo‘lib o‘tgani, ular reyslar sonini keskin oshirish haqida kelishib olgani xabar berilgan edi. Endi Sochi va Anapa kabi yangi manzillar qo‘shilayotgani ma’lum bo‘ldi, ular haqida tomonlar shu paytgacha kelisha olmayotgan edi.
Avvalroq tomonlar bir to‘xtamga kela olmagan yana bir masala — “Jukovskiy” aeroporti. O‘zbekiston uni poytaxt aeroporti deb hisoblagan, Rossiya esa uni Moskvaga nisbatan yaqin joylashganiga qaramay, regional deb atagan edi, bu uni belgilangan tashuvchilar va reyslar soni bo‘yicha cheklovlardan ozod qilgan bo‘lardi.
Endi esa tomonlar “Qish — 2018/2019” mavsumidan boshlab belgilangan tashuvchilarga “Jukovskiy” aeroportidan Qarshi va Nukusdagi punktlarga va aksincha, har bitta yo‘nalish bo‘yicha haftasiga ikkita reys bilan parvozlarni amalga oshirish huquqi taqdim etish haqida kelishuvga erishdi.
Shuningdek, tomonlar “Yoz — 2018” mavsumida parvozlar sonini 86 tagacha, “Qish — 2018/2019” mavsumida 105 tagacha va “Yoz — 2019” mavsumida 125 tagacha oshirish haqida kelishib oldi.
Izoh (0)