Ўзбекистон ва Россия Россиянинг «Жуковский» аэропортидан амалга ошириладиган парвозлар ҳақида келишиб олди, деб ёзади Spot «Росавиация» сайтига таяниб.
Аввалроқ 11 апрель куни Москвада Ўзбекистон ва Россия авиация маъмурларининг музокаралари бўлиб ўтгани, улар рейслар сонини кескин ошириш ҳақида келишиб олгани хабар берилган эди. Энди Сочи ва Анапа каби янги манзиллар қўшилаётгани маълум бўлди, улар ҳақида томонлар шу пайтгача келиша олмаётган эди.
Аввалроқ томонлар бир тўхтамга кела олмаган яна бир масала — «Жуковский» аэропорти. Ўзбекистон уни пойтахт аэропорти деб ҳисоблаган, Россия эса уни Москвага нисбатан яқин жойлашганига қарамай, регионал деб атаган эди, бу уни белгиланган ташувчилар ва рейслар сони бўйича чекловлардан озод қилган бўларди.
Энди эса томонлар «Қиш — 2018/2019» мавсумидан бошлаб белгиланган ташувчиларга «Жуковский» аэропортидан Қарши ва Нукусдаги пунктларга ва аксинча, ҳар битта йўналиш бўйича ҳафтасига иккита рейс билан парвозларни амалга ошириш ҳуқуқи тақдим этиш ҳақида келишувга эришди.
Шунингдек, томонлар «Ёз — 2018» мавсумида парвозлар сонини 86 тагача, «Қиш — 2018/2019» мавсумида 105 тагача ва «Ёз — 2019» мавсумида 125 тагача ошириш ҳақида келишиб олди.
Изоҳ (0)