13-aprel kuni Sirdaryo viloyati Sayxunobod tumanida O‘zbekiston Prezidenti Shavkat Mirziyoyev raisligida faollar yig‘ilishi bo‘lib o‘tdi. “O‘zbekiston 24” telekanali axborotiga ko‘ra, yig‘ilishda Prezident videokonferens-aloqa vositasida viloyatning har bir tumani vakillari bilan muloqotda bo‘lgan.
Jumladan, Mirzaobod tumanidan so‘z olgan agronom Bashorat Qodirova pillachilik sohasida xotin-qizlarga yaratilgan sharoit va yengilliklar munosabati bilan Prezidentga minnatdorchilik bildirdi.Assalomu alaykum, muhtaram Prezident! Men Mirzaobod tumani, “Agropilla” mas’uliyati cheklangan jamiyati agronomi Bashorat Qodirova bo‘laman.Ushbu tashakkurnomaga javoban Prezident pillachilik sohasida hali ko‘p o‘zgarishlar bo‘lishini, pilla yetishtirish bilan shug‘ullanayotgan fuqarolar daromadlari oshishini ta’kidlab o‘tdi.Siz pillachilikka juda katta e’tibor berdingiz. Siz bir oy pilla boqib, bir yillik mehnat stajiga ega bo‘lish imtiyozini yaratdingiz. Buning natijasida pilla boqqan ayollarimizga pensiya ta’minotida imtiyoz berdingiz. Buning ustiga 2023-yil 1-yanvargacha daromad solig‘idan ozod qildingiz.
Mirzacho‘lning mehnatsevar ayollari sizning mana shu qilayotgan ishlaringizga ming bora rahmat aytib, shukrona keltirmoqda.
Bashorat Qodirova, mirzaobodlik agronom
Rahmat! Bizda oxirgi yillari pilla masalasi ancha oqsoq, manfaatsiz bo‘lib qolgan desak, bu ham adolatdan bo‘ladi. Shuning uchun hamma qabul qilgan qarorlarimizning tagida bir narsa bor — kasanachilik bilan shug‘ullanish, uyda turib daromad topishning bir manbai nuqtai nazaridan pillachilikda hozir qilgan ishlarimiz oldindagi juda katta ishlarimizning boshlanishi.Bugun ham pilla masalasi bo‘yicha gaplashdik. Ayollarimizning qilgan mashaqqatli mehnatini jahon bozoriga chiqarish bo‘yicha juda katta chora-tadbirlar ko‘ryapmiz. Sizlarning sadoqatli mehnatlaring samarasi o‘laroq, mana, Mirzacho‘lda, Sirdaryoda shunday yuqori kayfiyat, mana shunday shijoat.
Ayolni, onani rozi qilsak, ertaga hamma ishlarimiz yaxshi bo‘ladi. Maktabgacha ta’lim tizimida qilinayotgan hamma ishlar ham ayollarni rozi qilish uchun. Ayolning mehnatini yengil qilishni hamma ham tushunavermaydi. Shuning uchun, bu sohada mehnat qilayotganingiz uchun sizga ta’zim va rahmat.
Lekin bir narsani biling — biz pillachilik sohasida har yili daromadni ham ko‘paytirib boramiz, sharoitni ham o‘zgartirib boramiz. Xudo xohlasa, pilla ham mana shu tumanda raqobat nuqtai nazaridan bir marta emas, rivojlangan davlatlarga o‘xshab bir yilda uch marta daromad oladigan bo‘ladi. Albatta, shu kunlarga kelamiz.
Shavkat Mirziyoyev, O‘zbekiston Prezidenti
Izoh (0)