O‘zbekiston yerlarining yarmidan ko‘p qismi qishloq xo‘jaligiga tegishli — Kadastr agentligi

Mamlakatning umumiy yer maydoni 44,9 million gektarni tashkil etadi. Bu haqda Kadastr agentligi xabar berdi.

O‘zbekiston yerlarining eng katta qismi qishloq xo‘jaligi uchun ajratilgan. Yaʼni 26,2 million gektar maydonlardan mazkur soha vakillari foydalanadi.

Respublika yer fondi tarkibida 11 million gektar yerlar o‘rmonlarga tegishli. Tabiatni muhofaza qilishga mo‘ljallangan yerlar ulushi ham nisbatan yuqori — 4,2 million gektar.

Mamlakat yerlarining 1,3 million gektari zaxira, 1 million gektari suv fondiga qarashli. Shu bilan birga, sanoat, transport, aloqa va mudofaa yerlari 798,8 ming gektar, aholi punktlari yerlari 221,5 ming gektarni tashkil etadi. Tarixiy-madaniy ahamiyatga ega yerlar maydoni esa 32,3 ming gektarga teng.

Kadastr agentligi tahliliga ko‘ra, respublika yerlarining 95 foizi (42,5 million gektar) “UZKAD” axborot tizimida elektron xaritaga tushirilgan.

“Shu asosda 42,1 million gektar yer uchun 1,9 millionta yerdan foydalanuvchilar kesimida kadastr yig‘ma jildlari shakllantirilib, davlat ro‘yxatidan o‘tkazildi”, deyiladi manba xabarida.

Huquqiy hujjatlari to‘liq bo‘lmagan 200 ming gektar yer maydonida faoliyat yuritayotgan 366,5 mingta subyekt foydalanuvchi sifatida hisobga olingan.

Bundan tashqari, 181,7 mingta ilgari hisobga olinmagan obyekt, 2,3 mingta qo‘shimcha qurilma aniqlanib, 155,8 milliard so‘m miqdoridagi soliqlar davlat byudjetiga hisoblangan.