14-aprel kuni Toshkent shahri Mirzo Ulug‘bek tumani “Oqibat” mahallasi aholisini bir necha oydan beri qiynayotgan muammo hal etildi, deb xabar beradi “Gazeta.uz”.
Gap shundaki, 2017-yilning 30-iyunida tuman hokimligi tomonidan “Zamonaviy mahalla” dasturi doirasida Big Build Group MChJga mahalladagi umumiy hovlidan 12 sotix yer ajratilgan edi.
Ushbu yer maydoni barcha tomondan o‘rab olinib, tez orada qurilish ishlari boshlanib ketdi. Biroq, mahalliy aholi vakillari bu yerda nima qurilayotganidan bexabar edi. Fuqarolar turli tashkilotlarga shikoyat arizalari bilan murojaat qilganidan so‘ng “sir” ochildi.
Ma’lum bo‘lishicha, bu yerda bir qismi mahalla guzariga ajratiladigan savdo-maishiy majmua barpo etilayotgan ekan. Turli yo‘nalishdagi tashkilotlar mahalla fuqarolarining shikoyat arizalarini uzoq o‘rgandi hamda 14-aprel kuni shahar prokuraturasi boshchiligidagi maxsus komissiya “Oqibat” mahallasida yashovchi fuqarolar bilan uchrashdi. Komissiya tarkibida obyekt qurilishiga ruxsat bergan tashkilotlarning mansabdor shaxslari ham kiritildi.
Komissiyaning fuqarolar bilan uchrashuvida “Oqibat” mahalla fuqarolar yig‘ini raisi M.Yo‘ldosheva tuman hokimligiga yolg‘on ma’lumot bergani aniqlandi. M.Yo‘ldosheva tuman hokimligiga yozgan xatida fuqarolar ishtirokida o‘tkazilgan kengaytirilgan majlisda ular mahalla hududidan Big Build Group MChJga qurilish uchun yer ajratilishini ma’qullaganini ma’lum qilgan. Aslida esa mahalla aholisining qurilishdan umuman xabari bo‘lmagan va yer maydoni ajratilishiga mahallada yashovchilardan hech kim rozilik bermagan.
Shu payti mahallaga Toshkent shahar hokimi Rahmonbek Usmonov tashrif buyurdi va fuqarolar bilan suhbatlashdi. Hokim shaharda “Zamonaviy mahalla” dasturi qabul qilingan bo‘lib, unga ko‘ra poytaxtdagi 505 ta mahallaning barchasida yangi mahalla markazlari qurilishi ko‘zda tutilganini ta’kidladi.
Fuqarolar mahallada bir nechta do‘konlar, kutubxona mavjudligini, biroq qurilish tufayli bolalar va sport maydonchalari yo‘qolib qolganini aytdi. To‘rt qavatli uy balandligida qurilayotgan ikki qavatli bino shaharsozlik normalariga zid ekanligini, qurilish turli salbiy oqibatlarni keltirib chiqarishi mumkinligi ma’lum qilindi.
Odamlarni tinglagan Rahmonbek Usmonov qurilishni to‘xtatish va avvalgi mahalla guzari hamda uning atrofidagi infratuzilmani qayta tiklash haqida qaror qabul qildi.
Shuningdek, Rahmonbek Usmonov “Oqibat” mahalla fuqarolar yig‘ini raisi M.Yo‘ldoshevani o‘z lavozimidan ozod qildi va fuqarolarga 15 kun ichida bo‘shab qolgan mahalla oqsoqoli lavozimiga munosib nomzodni taklif etishni topshirdi.
“Hokimning so‘zlarini eshitgan fuqarolar qarsak chalib yubordi, ko‘pchilikning ko‘zlariga yosh qalqdi. Bu esa quvonch ko‘z yoshlari edi”, — deyiladi xabarda.
Izoh (0)