O‘zbekistonda ilk bor ko‘chirib o‘tkazilgan jigar, Kattaqo‘rg‘ondagi portlash, Toshkentda ochiladigan yangi universitet va kunning boshqa muhim xabarlari

14-fevralning e’tiborga molik yangiliklari — “Daryo”ning kechki dayjestida.

1. Maktabgacha ta’lim tizimini rivojlantirishga qaratilgan islohotlar natijadorligi tahlil qilindi. Prezident Shavkat Mirziyoyev Janubiy Koreyaning Puchon universiteti bilan hamkorlikda Toshkent shahrida Maktabgacha ta’lim universitetini tashkil etish zarurligini ta’kidladi.

2. O‘zbekistonda ilk bor jigar bo‘lagini ko‘chirib o‘tkazish operatsiyasi bajarildi. Jigar sirrozidan aziyat chekayotgan 26 yoshli parkentlik Ubaydulla Dadaxo‘jayevga uning akasi Hayot Dadaxo‘jayevning donorligida jigar bo‘lagi transplantatsiyasi qilindi.

3. Kattaqo‘rg‘ondagi paxta zavodida portlash ro‘y berdi. 2 kishi halok bo‘ldi. Portlash tabiiy gaz sizib chiqishi oqibatida yuz bergani aytilmoqda.

4. 55 nafar O‘zbekiston fuqarosi o‘tirgan avtobus Qozog‘istonning Pavlodar viloyatida qutqarib qolindi. Rossiya chegarasiga yetib olgan yo‘lovchilarni belgilangan manzil tomon ruslarning avtobusi olib ketgan.

5. Toshkent shahrida chaqaloqni begonalarga topshirib, o‘zi g‘oyib bo‘lgan ayol qidirilmoqda. Voqea 12-fevral kuni yuz bergan.