Andijon shahrida Zahiriddin Muhammad Bobur tavalludining 535 yilligi munosabati bilan xalqaro ilmiy konferensiya bo‘lib o‘tdi. Bu haqda “Daryo” muxbiri Muhammadjon Obidov xabar berdi.
Anjumanda Bobur nomli xalqaro jamoat fondi raisi Zokirjon Mashrapov O‘zbekiston Prezidentining “Qadimiy yozma manbalarni saqlash, tadqiq va targ‘ib qilish tizimini yanada takomillashtirish chora-tadbirlari to‘g‘risida” gi qarori ijrosi, 2017-yilda amalga oshirilgan ishlar va 2018- yilgi rejalar haqida hisobot berdi.
Taniqli boburshunos olim Vahob Raxmonov “Bobur abadiyati” kitobida chop etilgan ilmiy maqolalarni sharhladi. Shoir Mirzo Kenjabekning “Mubayyan va nasriy bayoni”, “Risolai Volidiyya” nazmiy tarjimasi va sharhi” hamda yozuvchi Omina Tojiboyevaning “Shamollarga uchgan nidolar” kitoblarining taqdimoti bo‘lib o‘tdi.
Eron, Afg‘oniston, Yaponiya, Turkiya va Qirg‘izistondan kelgan olimlar Bobur adabiy merosini targ‘ib qilish va boburshunoslikning dolzarb vazifalari to‘g‘risida ma’ruza qildi.
Konferensiyada Bobur nomli xalqaro jamoat fondi tomonidan 2017-yilda “Bobur va dunyo” jurnali ta’sis etilgani, 20 dan ziyod mamlakat olimlari ishtirokida xalqaro konfenrensiya o‘tkazilgani, “Boburnoma” arab va ispan tillariga tarjima qilingani hamda “Bobur ensiklopediyasi”ning ikkinchi nashri chop etilgani mamnuniyat bilan e’tirof etildi.
Zokirjon Mashrapov O‘zbekiston Prezidenti Shavkat Mirziyoyev 2017-yilda Andijon viloyatiga tashrifi chog‘ida Bog‘i Boburni kengaytirish, bu yerda yangi muzey, kutubxona barpo etish haqida ko‘rsatma bergani, bu ishlar 2018-yilda amalga oshirilishini ma’lum qildi.
Izoh (0)