Namangan viloyati aholisiga ko‘rsatilayotgan oftalmologiya yordamini yanada takomillashtirish maqsadida Respublika ixtisoslashtirilgan ko‘z mikroxirurgiya ilmiy-amaliy tibbiyot markazi Namangan filiali tashkil etiladi. Bu haqda Namangan Today xabar berdi.
Statistik ma’lumotlarga ko‘ra, viloyat aholisi o‘rtasida birgina ko‘z kataraktasini jarrohlik yo‘li bilan davolashga muhtojlar soni 6 ming kishidan ko‘p. Viloyat ko‘p tarmoqli tibbiyot markazining ko‘z kasalliklari bo‘limida yiliga ularning atigi 250-300 nafariga jarrohlik amaliyotlari o‘tkazib kelinmoqda. Qolgan bemorlar esa qo‘shni Andijon, Farg‘ona hamda poytaxt klinikalariga borishga majbur bo‘lmoqda.
Bolalar va kattalar o‘rtasida ko‘z jarohatlanishi yuz berganda viloyat muassasalarida alohida shoshilinch oftalmologiya xizmati ko‘rsatuvchi bo‘lim tashkil etilmagan. Oqibatda tungi paytlarda murojaat etuvchi bemorlar vaqtida yordam ololmayotgandi. Endi bu muammolarga barham beriladi.
Filial 80 o‘rinli bo‘lishi mo‘ljallangan. Bu yerda aholiga yuqori malakali ixtisoslashtirilgan tibbiy yordam ko‘rsatish bilan birga ko‘z kasalliklari profilaktikasi, diagnostikasi va davolashning zamonaviy ilg‘or usullari qo‘llanadi. Aholiga qulaylik yaratish maqsadida tunu kun faoliyat olib boradigan shoshilinch tez yordam posti tashkil qilinadi.
Shahar va tumanlar markaziy shifoxonalari oftalmologiya bo‘limlariga tashkiliy-uslubiy, tibbiy yordam ko‘rsatishning zamonaviy usullari va texnologiyalarini amaliyotga joriy etish, zarur profilaktik ishlarning amalga oshirilishiga ko‘maklashish, sayyor konsultatsiyalar, “Mahorat darslari” uyushtirish rejalashtirilgan.
Shuningdek, filial tibbiyot xodimlari ko‘z kasalliklari diagnostikasi va ularni davolashning zamonaviy usullari bo‘yicha Respublika ixtisoslashtirilgan ko‘z mikroxirurgiyasi ilmiy-amaliy tibbiyot markazi, Toshkent vrachlar malakasini oshirish instituti, Andijon va Samarqand davlat tibbiyot institutlarining oftalmologiya kafedralarida malaka oshiradi.
Izoh (0)